लिभरपुल ट्याक्सी विष्फोटनको योजनाकारको पहिचान सार्वजनिक

लण्डन । बेलायतको लिभरपुलस्थित वुमन्स अस्पतालको प्रवेशद्वारमा आइतबार भएको ट्याक्सी विष्फोटका मुख्य योजनाकारको परिचय प्रहरीले सार्वजनिक गरेको छ ।

प्रहरीका अनुसार ३२ वर्षीय इमाद अल स्वेमीन सो विष्फोटको योजनाकार हुन् । उनको सो विष्फोटमा परी निधन भएको छ ।

मध्यपूर्वबाट बेलायत आएका उनी शरणार्थी रहेको र चार वर्षअघि मात्र धर्म परिवर्तन गरी क्रिश्चियन बनेको पाइएको छ ।

प्रहरीले उनको कोठाबाट थुप्रै सामग्री फेला पारेको बताएको छ ।

इमाद केही समयदेखि मानसिक समस्याले ग्रस्त भएको पनि पाइएको छ ।

प्रहरीले सो घटनामा इमाद एक्लैको संलग्नता रहेको प्रारम्भिक निस्कर्ष निकालेको छ भने यसअघि पक्राउ परेका चार जनालाई रिहा गरेको छ ।

प्रहरीका अनुसार इमादले घरमा बनाइएको विष्फोटक पदार्थ बोकेर ट्याक्सी चढेको पाइएको छ ।

सो ट्याक्सीका चालक भने उपचारपछि घर फर्किसकेका छन् ।

उता बेलायत सरकारले बेलायतमा आतङ्कवादी आक्रमणको खतराको स्तरलाई बढाएको छ ।