दुई मुख्य मन्त्रीले दिए राजिनामा

काठमाडौँ । १ नम्बर प्रदेश र कर्णाली प्रदेशका मुख्यमन्त्रीहरुले सोमबार राजिनामा दिएका छन् ।

कर्णाली प्रदेशका मुख्यमन्त्री महेन्द्रबहादुर शाहीले आज पत्रकार सम्मेलन गर्दै कांग्रेस प्रदेशसभा दलका नेता जीवनबहादुर शाहीसँगको पूर्वसहमतिअनुसार राजिनामा दिएको घोषणा गरेका छन् ।

मुख्यमन्त्री शाहीले गत वैशाख ३ गते विश्वासको मत लिँदा छ महिनापछि कांग्रेसलाई सत्ता हस्तान्तरण गर्ने सहमति गर्नुभएको थियो । मुख्यमन्त्री शाहीले पदबाट राजीनामा दिएपछि कांगेस प्रदेशसभा दलका नेता जीवनबहादुर शाहीलाई मुख्यमन्त्री बन्ने बाटो खुला भएको छ ।

कांग्रेस प्रदेशसभा दलका नेता जीवन शाहीले मुख्यमन्त्रीकै सहमतिअनुसार आफू मुख्यमन्त्री बन्ने बताउनुभयो । “हामीबीच भद्र सहमतिअनुसार उहाँले राजीनामा दिनुभएको छ,” उहाँले भन्नुभयो, “मुख्यमन्त्रीले राजीनामापश्चात् दुई/चार दिन पर्खन अनुरोध गरे त्यहीअनुसार आफू मुख्यमन्त्री बन्ने सोच गरेको छु ।”

यसैगरी,  प्रदेश नं १ को प्रदेशसभाको आजको बैठकलाई आज सम्बोधन गर्दै मुख्यमन्त्री भीमप्रसाद आचार्यले आफूले मुख्यमन्त्रीबाट राजीनामा दिने जानकारी दिनुभएको हो ।

प्रदेशसभाको हिउँदे तथा आठौँ अधिवेशनको आज बसेको बैठकमा प्रदेशसभामा नेकपा एमालेतर्फका सांसदको बहुमत नरहेका कारण राजीनामाको घोषणा गर्नुभएको थियो । मुख्यमन्त्री आचार्यले गत भदौ १० गते मुख्यमन्त्रीको शपथ लिनुभएको थियो ।

मुख्यमन्त्री आचार्यले आजको बैठकमा विश्वासको मत लिन यसअघि नै प्रस्ताव पेश गर्नुभएको थियो । उहाँको पक्षमा बहुमत नदेखिएपछि राजीनामा दिने निष्कर्षमा पुग्नुभएको हो । आजको प्रदेशसभा बैठकलाई सम्बोधन गर्दै उहाँले मुलुकको विकास र समृद्धिका लागि सबै राजनीतिक दल एक हुनुको विकल्प नभएको बताउनुभयो ।

हालै लोकतन्त्र र संविधानका लागि सङ्घर्ष गरेर आएका दलहरुले यसको रक्षाका निम्ति पनि एकजुट हुनुको विकल्प नरहेको भन्दै आफ्नो नेतृत्वको सरकारले छोटो समयमा पनि रचनात्मक कार्य गरेको बताउनुभयो । त्यसपछि सभामुख प्रदीपकुमार भण्डारीले अर्को बैठक कात्तिक २३ गते दिउँसो १ बजे बस्ने जानकारी दिनुभयो ।

 

प्रतिक्रिया

सम्बन्धित सामाग्री