लण्डन । गैरआवासीय नेपाली संघ युकेले सेप्टेम्बर १९ को साँझ एक च्यारिटी डिनर कार्यक्रम गर्ने भएको छ ।
संघका अध्यक्ष प्रेम गाहामगरको अध्यक्षतामा सोमबार बसेको भर्चुअल बैठकले आगामी सेप्टेम्बर १९ मा हुने ग्लोबल हेल्थ कन्फरेन्स कार्यक्रमपश्चात सोही स्थानमा एक च्यारिटी डिनर कार्यक्रम गर्ने निर्णय गरेको हो ।
सो कार्यक्रम च्यारिटी विभागको आयोजनामा हुने र संयोजन च्यारिटी विभाग प्रमुख उपाध्यक्ष गोविन्द खरेलले गर्ने निर्णय गरिएको छ ।
बैठकमा संघको आसन्न महाधिवेशन युकेबाट भाग लिने प्रतिनिधिहरुको नामावली बारे कार्य समितिलाई अध्यक्ष प्रेम गाहा मगर र उपाध्यक्ष नारायणदत्त कँडेलले जानकारी दिई उठेका जिज्ञासाहरुको जवाफ दिने प्रयास गरेका थिए ।
बैठकमा कार्यसमितिमा मनोनित गरिने सदस्यहरुका बारेमा विधानमा अस्पष्टता देखिएकोले स्पष्ट पार्ने जिम्मा उपाध्यक्षत्रय नारायण कँडेल, रामचन्द्र पोखरेल र गोविन्द खरेललाई दिइएको छ ।
यसैगरी संघले अक्टोबर २ मा एक धन्यवाद – शपथ ग्रहण – सम्मान कार्यक्रम आयोजना गर्ने निर्णय गरेको छ । सो कार्यक्रम अल्डरसटस्थित पालेसमा आयोजना गरिने र सो कार्यक्रममा नवनियुक्त सल्लाहकारहरु र संरक्षक परिषदलाई सम्मान गर्ने, कार्यसमितिमा मनोनित सदस्यहरुलाई शपथ गराउने र निर्वाचन समितिलाई धन्यवाद ज्ञापन गरिने छ । सोको संयोजनको जिम्मा महासचिव खुशी लिम्बुलाई दिइएको छ ।
संघका सल्लाहकारहरुको नामावली सेप्टेम्बर ६ भित्र तयार पार्ने र सेप्टेम्बर १३ को जूम बैठकमा नामावलीउपर कार्यसमितिमा छलफल गर्ने र आवश्यक परिमार्जनसहित उक्त नामावलीलाई सेप्टेम्बर २७ भित्रमा अन्तिम रुप दिने निर्णय गरिएको छ ।
संघको कार्यालय स्थापना बारे कोषाध्यक्ष विष्णु खरेलले एनआरएनए यूकेको कार्यालय स्थापनार्थ भइरहेका गतिविधिहरुबारे कार्यसमितिलाई जानकारी दिनुभएको थियो । बैठकमा अध्यक्ष प्रेम गाहा मगरले कोषाध्यक्ष बिष्णु खरेललाई अल्डरशटमा कार्यालय स्थापनार्थ उपाध्यक्ष सुनिलबाबु खड्का र प्रवक्ता भरतमणी चोङबाङसंग पनि आवश्यक सल्लाह र सहयोग लिएर कार्य गर्न सल्लाह दिनु भयो ।
बैठकमा कोषाध्यक्ष विष्णु खरेलले आफ्नो आर्थिक विभागमा सहसंयोजक १, सदस्य सचिव १, सदस्य १ र सल्लाहकार १ गरी चार जना सदस्यहरु मनोनयन गर्ने र उनीहरुको नामावली अर्को बैठकमा पेश गर्ने भनी बैठकलाई जानकारी गराए । यस्तै प्रेस मिडिया विभाग बारेमा प्रवक्ता भरतमणी चोङबाङले पनि आफ्नो प्रेस तथा प्रचारप्रसार विभागमा सहसंयोजक १, सदस्य सचिव १ र सदस्यहरु २ गरी बढीमा चार जना सदस्यहरु मनोनयन गर्ने र उनीहरुको नामावली अर्को बैठकमा पेश गर्ने भनी बैठकलाई जानकारी गराए ।
