नेपालबाट अन्तर्राष्ट्रिय उडानको संख्या थपियो

काठमाडौँ । सरकारले कोटा निर्धारण गरेर आन्तरिक तथा अन्तरराष्ट्रिय हवाई उडान सञ्चालन गर्ने निर्णय गरेको छ ।

मन्त्रिपरिषद्को सोमबार बसेको बैठकले कोभिड–१९ महामारी नियन्त्रणका लागि स्थगन गरिएका हवाई उडान शर्तसहित पुनःसञ्चालन गर्ने निर्णय गरेको संस्कृति, पर्यटन तथा नागरिक उड्डयन मन्त्रालयले जनाएको छ ।

अन्तर्राष्ट्रियतर्फ नियमित हवाई उडान सङख्या थप गर्ने निर्णय भएको छ । काठमाडौँ–दोहा गन्तव्यमा दुवै मुलुकका समान दुई वायुसेवा कम्पनीले सातामा चार उडान गरिनेछ । काठमाडौँ–स्तानबुलमा साताको दुईवटा, काठमाडौँ–दुबईमा सातामा चार वटा उडान हुने जनाइएको छ ।
यसैगरी, काठमाडौँ–दमाम गन्तव्यमा दुईवटा, काठमाडौँ–कुवेतमा साताको दुईवटा , काठमाडौँ–मस्कटमा साताको एउटा र मलेसियामा साताको चारवटा उडान सञ्चालन गरिनेछ । त्यस्तै, दक्षिण कोरिया र जापानमा समान एउटा उडान तथा काठमाडौँ–छेन्दु र ग्वाङजाओ गन्तव्यमा साताको समान एक–एक वटा उडान सञ्चालन हुनेछ ।

मन्त्रालयका अनुसार गन्तव्य र वायुसेवा कम्पनीअनुसार कोटा तोकेर उडान सञ्चालन हुनेछन् । स्वास्थ्यको पूर्ण पालना हुनेगरी अर्को आदेश जारी नभएसम्मका लागि आन्तरिकतर्फ कूल उडान सङ्ख्याको ५० प्रतिशतमा नबढ्ने गरी सञ्चालन गरिने र उपयुक्त उडान तालिका र मिति पर्यटन मन्त्रालयले तय गर्ने मन्त्रिपरिषद्को निर्णयमा उल्लेख छ ।