वृक्ष अनि म

म र वृक्ष उस्ता उस्तै लाग्छ

जमिन मुनि वृक्षको जरा छ

नाभी चक्रमा मेरो जरा निहित छ

वृक्षको हाँगा , डाली ,पात छन्

मेरो पनि हाँगा रुपी केश ,खुट्टा ,हात छन्

मैले फालेको कार्बनडाइअक्साइड रुखले लिन्छ

रुखले फालेको अक्सिजन प्राणवायु मैले लिन्छु

म छु र त ठिङ्ग उभिएर झुप्प हरित पातमा रुख हाँस्छ

रुख छ र त मेरो जीवनको अस्तित्व धर्तीमा बाँच्छ

म बिना रुख जिउन सक्दैन

र त रुखले मलाइ बचाई रहन्छ प्राण वायु दिएर ,फल ,अन्न ,जडिबुटि दिएर मलाई पोषित गर्छ

मेरो जीवनको अस्तित्व पनि रुख बिना सम्भव छैन

मेरो प्राण सिंगो रुखमा अड्किएको छ

रुखको पात पातमा मेरो फोक्सोको कणकोषहरु फिजिएका छन्

म र वृक्ष उस्ता उस्तै छौं

हामी दुवै एक अर्काका परिपूरक हौं

वृक्ष काटिनु मेरो फोक्सो काटिनु हो

धर्तीमा प्रदुषण फैलाउनु म र वृक्ष दुवैको अस्तित्व संकटमा पर्नु हो

म र वृक्ष बीच प्रदुषण जब आउँछ

तब पर्यावरणको चिरहरण हुन्छ

दुषित पर्यावरणले मेरो र वृक्ष दुवैको सर्वस्वहरण हुन जान्छ

ओैधौगिकरण, विषाक्त धुवाँ, वन फडानीमा वृक्षको हत्या

ग्लोबल वार्मिङ्गको आहत यी सहिनसक्नु पर्यावरण माथिको अन्याय हुन्

पर्यावरणमा प्रदुषण फैलँदा धर्तिको सुन्दरता र जीवन संकटमा फस्नेछ

यही कारण वृक्षलाई मैले जोगाउनु छ

पर्यावरणमा प्रदुषण फैलाउनु हुन्न भन्ने महासंकल्प गर्नु छ

वृक्ष रोपन गरेर ,मलजल दिएर हरियाली बनाउनु छ

प्रकृतिको समिप रही जिवनमा संजीवनी छर्नु छ

मुस्कुराएको सुन्दर धरा, स्वच्छ पर्यावरणमा वृक्षको अहम भूमिका छ

सबैको साझा बसेरा धर्ति मातालाई बचाउन

म र वृक्ष दुवैको आधा आधा मिलाएर पूर्ण योगदान रहने छ

म वृक्षलाई बचाउँछु, वृक्षले मलाई बचाउँछ

तब मात्र प्रकृतिको सन्तुलन कायम रहन्छ

सन्तुलित प्रकृतिमा नै समस्त जीव, वनस्पति ब्यवस्थित रहन्छ

म र वृक्ष उस्ता उस्तै

हामी दुवै शक्तिको पुञ्ज जीवनको आधार ,जगतको श्रृंगार, प्रकृतिको किरदार

म र वृक्ष उस्ता उस्तै