एनआरएनए : एकीकृत नमुना बस्ती हस्तान्तरण

गोरखा — धार्चे गाउँपालिका–४ लाप्राकस्थित गुप्सीपाखामा भूकम्प पीडितका लागि बनेको एकीकृत नमुना बस्ती हस्तान्तरण गरिएको छ ।

बिहीबार राष्ट्रिय पुनःनिर्माण प्राधिकरणका प्रमुख कार्यकारी अधिकृत सुशिल ज्ञवाली र गैरआवासीय नेपाली संघ(एनआरएनए)का अध्यक्ष कुमार पन्तले संयुक्त रुपमा बस्ती हस्तान्तरण गरे । बस्ती हस्तान्तरण समारोहमा भाग लिन चारवटा हेलिकप्टरमा पुनःनिर्माण प्राधिकरण र एनआरएनएका प्रमुख तथा प्रतिनिधि बिहीबार गुप्सीपाखा आएका थिए ।

एकदेखि डेढ वर्षमै बस्ती पुनःनिर्माण सक्ने योजना रहेपनि वर्षा र हिउँ पर्दा ढिला भएको गैरआवासीय नेपाली संघ (एनआरएनए) का अध्यक्ष कुमार पन्तले बताए । ढिलै भएपनि सुन्दर बस्ती बनाएर हस्तान्तरण गरेको उनको भनाइ छ । गुप्सी पाखालाई पूर्वाधारयुक्त बस्ती बनाउने पुनःनिर्माण प्राधिकरणका प्रमुख कार्यकारी अधिकृत सुशिल ज्ञवालीले बताए । खानेपानी, ढल,नाली तथा पहिरो नियन्त्रण लगायतका काम गर्ने योजना अघि बढिरहेको उनको भनाइ छ ।