तस्वीर स्काइन्यूज
लण्डन । बेलायतमा आजबाट कोरोना भाइरसविरुद्धको तेस्रो खोप लगाउन शुरु गरिएको छ ।
मोडर्नाले विकास गरेको कोरोनाभाइरस विरुद्धको खोप आज वेल्सको कामर्थानस्थित वेष्ट वेल्स जनरल अस्पतालबाट लगाउन शुरु गरिएको हो । साथै सो खोपको करिब ५ हजार डोज विभिन्न खोप केन्द्रहरुमा वितरण गरिएको बताइएको छ ।
बेलायतमा यसअघि फाइजर-बायोएनटेक तथा अक्सफोर्ड आष्ट्राजेनिका गरी दुई किसिमका कोरोना भाइरसविरुद्धका खोपहरु मात्र लगाइँदै आएको थियो ।
बेलायतले सो खोपको १ करोड ७० लाख मात्रा अर्डर गरेको छ । यो खोप पनि हरेकलाई दुई डोज दिइनुपर्ने भएकाले सो अर्डरबाट करिब ८५ लाख मानिसलाई पुग्ने हुन्छ ।
सो खोपको परीक्षणमा सो खोप मानिसहरुलाई कोरोना भाइरसका कारण गम्भीर बिरामी पर्नबाट रोक्न शतप्रतिशत प्रभावकारी हुने देखिएको छ ।
