बिहीबार, असार १० २०७८ | Thu, June 24, 2021
नेपालको समय: ०६:१३ | UK Time: 01:28

एनआरएनए युके भित्र आर्थिक अनियमितता छ : छानबिन  समिति

फगामीलाई दोष लगाउने प्रयास, चार उपाध्यक्षको एजेण्डा प्रमाणित

वीनेपाली
२०७७ चैत १३ गते ७:५३

लन्डन । गैरआवासीय नेपाली संघ (एनआरएनए) यूकेले आफैले गठन गरेको आर्थिक छानबिन समितिले  संस्था भित्र अनियमितता भएको सार्वजनिक रुपमै स्वीकार गरेको छ । तीन सदस्यीय आर्थिक छानबिन समितिले तयार पारेको प्रतिवेदनमा कोषको दुरुपायोग भएको ठहर गरेको हो ।संस्थाका चार उपाध्यक्षहरु प्रेम गाहामगर, रामचन्द्र पोखरेल, मोहन कार्की र नारायण कंडेलले आर्थिक पारदर्शिताको एजेण्डा बैठकमा चर्काे ढंगले उठाउदै आएका थिए । उनीहरुकै एजेण्डालाई पुष्टी गर्ने गरि समितिले छानविन प्रतिवेदन तयार पारेको छ । समितिले गत शुक्रबार कार्यसमितिलाई बुझाएको प्रतिवेदन एनआरएनए युके कार्यसमितिको बैठकमा सोमबार छलफल गरेपनि सार्वजनिक गरिएन । गत सोमबार इमेलबाट प्रतिवेदन कार्यसमिति सदस्यहरुलाई उपलव्ध गराउने प्रतिबद्धता अध्यक्ष पुनम गुरुङले गरेपनि बिहीबार साँझ मात्र महासचिव फडिन्द्र भट्टराईले उपलव्ध गराएका थिए ।पुर्व अध्यक्ष योगकुमार फगामी नेतृत्वको कार्यसमितिले बुझाएको हिसाब किताबको पारदर्शिता माथि प्रश्न उठेपछि कार्यसमिति बैठकले बहुमतबाट चार्टर्ड एकाउन्टेन्ट एलएन पाण्डेको संयोजकत्वमा आर्थिक छानबिन समिति गठन गरेको थियो । समिति सदस्यमा डा मुकुन्द बाँस्तोला र मेजर बुद्धि गुरुङ छन । उक्त समितिले बुझाएको प्रतिवेदनलाई कार्यसमितिमा आवश्यक छलफलपछि सार्वजनिक गरिने बताइन्छ।
प्रतिवेदनले फगामी नेतृत्वको सिंगो कार्यसमितिलाई दोषी देखाएको छ । ‘तत्कालीन कार्यसमिति नै यसमा जिम्मेवार छ,’ प्रतिवेदनले भनेको छ ।प्रतिवेदनले संस्थाको निगरानी र नियन्त्रण राम्रो संग नगरेको, ठूलो राशीको नगद कारोबार गरिएको, अनाधिकृत रुपमा खर्चहरु गरिएको, मतगणनास्थल र सदस्यता डाटा इन्ट्री तथा कार्ड छपाईमा आवश्यकताभन्दा बढी रकम खर्च गरिएको, उम्मेदवारी शुल्कको विस्तृत विवरण प्राप्त गर्न नसकेको र विधान कार्यान्वयन गर्न नसकेकोलगायतको समस्या देखाएको छ ।प्रतिवेदनमा केही सदस्यहरुको सोध भर्ना वाँकी रहेको बताए पनि कसको कति रकम वाँकी भन्ने केही खुलाइएको छैन । प्रतिवदेनमा  पदाधिकारी तथा सदस्यहरुलाई एनआरएनए केन्द्रको विधान एवम् बेलायतको कानूनबारे ज्ञान नभएको भन्दै प्रशिक्षण लिन सुझाब दिइएको छ ।

त्यस्तै, एकल निर्णयबाट नगद कारोबार गरेको विषयमा तत्कालीन अध्यक्ष फगामीले कोषाध्यक्ष नेपाल गएको, अधिवेशन तयारीका लागि काम गर्नैपर्ने भएको आफूलाई कार्यसमितिले अधिकार प्रदान गरेको जस्ता कारण पेश गरेको जनाइएको छ ।  प्रतिवेदनले सदस्यता र उम्मेदवारी शुल्कबाट २ लाख ७ हजार ६ सय पाउण्ड कूल आम्दानी देखिएको छ ।

गोलमोटोल प्रतिवेदन

एनआरएनए युके कार्यसमितिले आफैलाई सहयोग हुने गरि निर्माण गरेको आर्थिक अनियमितता छानविन समितिले ठोस प्रतिवेदन भन्दा पनि सैद्धान्तिक बिषय राखेर गोलमोटल प्रतिवेदन तयार पारेको देखिएको छ । करीव एक दर्जन व्यक्तिहरुसँग अन्तरवार्ता र सोधपुछ गर्दा पनि कति रकम हिनामिना भयो ? कसले कति रकम लिन वा तिर्न वाँकी छ भन्ने कुरामा प्रतिवेदन अस्पष्ट  छ । प्रतिवेदनले  सैद्धान्तिक र बेलायतका लेखा प्रणालीका बारेमा सुझाब दिएपनि हिसाब किताबको बारेमा स्पष्ट उत्तर दिएको छैन ।

प्रतिक्रिया

सम्बन्धित सामाग्री

फेसबुक