शेर्पा संघ बेलायतको २२ औं वार्षिक साधारणसभा सम्पन्न

स्वर्गीय आङकलजंग लामाको फोटोमा दिप प्रज्वलन साथै खादा र फूल अर्पण

लन्डन । शेर्पा संघ बेलायतको २२ औं वार्षिक साधारणसभा सम्पन्न भएको छ ।

लन्डनको फेल्टमस्थित नमस्ते गुर्खा रेस्टुरेन्टमा ६ सेप्टेम्बर २०२५ मा शेर्पा संघ बेलायतको साधारणसभा सम्पन्न भएको हो । संघका अध्यक्ष रिन्जी शेर्पा लामाको अध्यक्षतामा र बुद्धिष्ट कम्युनिटी सेन्टर यूकेका अध्यक्ष आङदावा च्यावाको प्रमुख आतिथ्यामा सम्पन्न भएको वार्षिक साधारणसभा संचालन महासचिव नोर्बु शेर्पाले गर्नुभएको थियो ।

संघका प्रथम उपाध्यक्ष नुरी शेर्पाले स्वागत मन्तव्य राख्नुभएको थियो । सभामा कार्यसमितिका सदस्यहरु, संघका सल्लाहकारहरु साथै आजीवन तथा साधारण सदस्यहरुको उपस्थिति रहेको थियो ।

महासचिव शेर्पाले संस्थाको वार्षिक प्रतिवेदन र कोषाध्यक्ष छेते शेर्पाले आर्थिक प्रतिवेदन प्रस्तुत गर्नुभएको सभामा विभिन्न प्रस्तावहरुमाथि छलफल गरी निर्णय पारित गरिएको थियो । सभाले संघका निवर्तमान अध्यक्ष आङ दावा च्यावाद्वारा प्रस्तावित शेर्पा संघ बेलायत साउथ सेन्ट्रल कम्युनिटीका संस्थापक अध्यक्ष शान्ता शेर्पालाई शेर्पा संघ बेलायतको सल्लाहकार चयन गरेको छ ।

सभामा शेर्पा संघ बेलायतका संरक्षक स्वर्गीय आङकलजंग लामाको फोटोमा खादा र फूल अर्पण गरी दिप प्रज्वलन गरिएको थियो । उहाँको सम्झना र सम्मानमा एक मिनेट मौनधारण गरिएको थियो । साथै लामाको आत्माको चिरशान्तिको कामना गर्दै मणि जप गरिएको संघका महासचिव शेर्पाले जानकारी दिनुभयो ।

स्वर्गीय लामाको शेर्पा समुदायप्रति अतुलनीय योगदान रहेको चर्चा गरिएको थियो । सभामा स्वर्गीय आङकलजंग लामाकी धर्मपत्नी माया लामा र दुई छोराहरुको उपस्थिति रहेको थियो । सोही अवसरमा स्वर्गीय लामाका धर्मपत्नी मायाले शेर्पा संघ बेलायतलाई १ हजार १५ पाउन्ड प्रदान गरी शेर्पा संघ बेलायतको पहिलो ट्रस्टी मेम्बर बन्नुभयो ।#

वार्षिक साधारणसभाको अन्त्यमा संघका अध्यक्ष रिन्जी शेर्पा लामाले उपस्थित सबैलाई धन्यवाद दिँदै सभा समापन गर्नुभएको थियो ।