शनिबारदेखि लण्डन कोरोनाको संक्रमणको ‘उच्च सतर्कता’ मा पर्दै

लण्डन । लण्डनमा कोरोना संक्रमण बढेसँगै यही शनिबारदेखि थप कडाइ अपनाइने भएको छ ।

बीबीसीले एक लण्डनका सांसदलाई उद्धृत गर्दै शनिबारदेखि लण्डनको सतर्कताको स्तर ‘मध्यम’बाट ‘उच्च’ मा परिवर्तन हुने बताएको छ । जसका कारण लण्डनका लाखौँ बासिन्दाले एकाघरका बाहेक अन्यसँग घरभित्र भेटघाट गर्न पाउने छैनन् ।

बेलायत सरकारका मन्त्रीहरुलाई यसबारेमा स्वास्थ्य राज्यमन्त्री हेलेन ह्वेटलीले जानकारी गराएको बताइएको छ ।

यस्तै फरक घरका बासिन्दाहरुलाई पब तथा रेस्टुरेन्टहरुमा पनि घुलमिल हुन प्रतिबन्ध लाग्न सक्ने बताइएको छ ।

सरकार र स्थानीय नेतृत्वबीच कोरोना भाइरसको संक्रमण फैलन नदिन अझै कडा नियन्त्रणका उपायहरु धेरै क्षेत्रमा विस्तार गर्नेबारे छलफल जारी छ ।

लण्डनका मेयर सादिक खानले कसैले पनि कडा नियन्त्रणका उपायहरु नचाहेको तर लण्डनबासीलाई सुरक्षित राख्न यो कार्य आवश्यक रहेको बताएका छन् ।

सरकारले यसैसाता कोरोना संक्रमणको अवस्था हेरी सतर्कताका तीन चरण  घोषणा गरेको थियो । जसमा अति उच्च, उच्च र मध्यम तह छन् । अति उच्च तहमा लिभरपुल क्षेत्र परेको छ भने ग्रेटर म्यानचेष्टर र ल्यांकासायर पनि आज पर्नसक्ने छ ।