आइतबार, असोज ४ २०७७ | Sun, September 20, 2020
नेपालको समय: १८:५० | UK Time: 14:05

अक्सफोर्ड विश्वविद्यालयको कविता प्रतियोगितामा मुकाहाङ लिम्बु पहिलो

वीनेपाली
२०७७ भदौ ५ गते ८:१५

फाइल फोटो

लण्डन । विश्व प्रतिष्ठित अक्सफोर्ड विश्वविद्यालयभित्र वर्षेनी आयोजना हुने कविता प्रतियोगितामा नेपाली मूलका मुकाहाङ लिम्बुले दुवै प्रतियोगिता जितेका छन् ।

अक्सफोर्ड युनिभर्सिटी पोइट्री सोसाइटीले यसवर्ष आयोजना गरेको मार्टिन स्टार्की र डार्ट पुरस्कार उनले हात पारेका हुन् ।

सोसाइटीका अनुसार लिम्बुको कविता ‘रिपब्लिक अफ म्याकारेल’ले मार्टिन स्टार्की पुरस्कार जितेको छ । यस्तै मिकेला कोपलेनको ‘माउण्ट निराकगोन्गो’ शीर्षकको कविताले दोस्रो र लुसी थाइनको ‘इट वजन्ट सो मच’ शीर्षकको कविताले तेस्रो स्थान पाएको छ ।

यस्तै, डार्ट पुरस्कारतर्फ लिम्बुको ‘बोइज स्मेल’ शीर्षकको कविता प्रथम भएको छ भने भेट सिगर्टको ‘आवर लेडी अफ ला ट्रिनिडाड’ दोस्रो र मिकेला कोप्लेनको ‘सम टाइम्स आफ्ट अ लङ डे एट वक आई प्रिटेन्ड आइएम अ प्राइज विनिङ पोनी’ ले तेस्रो पुरस्कार जितेको छ ।

अक्सफोर्ड विश्वविद्यालयको क्वीन्स कलेजमा अ‌ंग्रेजी र जर्मनका स्नातकका विद्यार्थी लिम्बुले दुवै प्रतियोगिता जितेवापत ५०० पाउण्ड नगद पुरस्कार जितेका छन् । यसका साथै उनका कविताहरु सोसाइटीको ‘द आस’ नामक म्यागाजिनमा पनि प्रकाशन हुनेछ ।

सो प्रतियोगितामा अक्सफोर्ड विश्वविद्यालयमा अध्ययनरत सबै विद्यार्थीहरुले भाग लिन पाउँछन् । प्रतियोगितामा मुकाहाङले पठाएका तीन कवितामध्ये दुई वटाले प्रथम स्थान पाएको छ भने तेस्रो कविता पनि ‘सर्ट लिष्ट’मा परेको छ ।

वीनेपालीसित कुरा गर्दै उनले बोइज स्मेल कवितामा गोरखा सैनिक परिवारको विषयवस्तु समेटिएको बताए । ‘मेरा हजुरबुबा गोरखा हुनुहुन्थ्यो । मैले कवितामा ब्यारेकको जीवन, नेपाल यात्राका बारेमा लेखेको छु’ उनले भने।

यसअघि स्कुल तहमा अध्ययनरत रहँदा नै उनी सन्डे टाइम्सको ‘योङ राइटर्स’को सूचीमा परिसकेका उनको कविता चारवटा कविता संग्रहमा प्रकाशित भइसकेको छ । उनको एकल पुस्तक भने प्रकाशन भइसकेको छैन ।

उनकी आमा रीना सुनुवारले छोराको पढाइका लागि आफूले गरेको कठोर परिश्रमलाई छोराको सफलताले बिर्साएको बताइन् ।

अंग्रेजी साहित्यमा रुचि राख्ने मुकाहाङको कविता मनपर्ने विधा हो। उनी कुन कविबाट प्रभावित छन् त भन्ने प्रश्नमा उनले धेरैजनाबाट प्रेरणा पाएको बताए । केहीको नाम लिन गरेको आग्रहमा उनले ओसन इभोङ, फ्रान्क ओ हारा र म्यारी जिमजान्डसलाई सम्झिए ।

साहित्यिक र प्राज्ञिक विरासत नभएका र अहिले पनि नेपाली प्रष्ट बोल्ने मुकाहाङको यो सफलता छैन त गर्व गर्न लायक ?

 

प्रतिक्रिया

सम्बन्धित सामाग्री

फेसबुक