अक्टुबर १७ मा बेलायतको रेडिङमा दसैं तथा तिहार विशेष कार्यक्रम आयोजना गरिने

लन्डन । ग्रेटर रेडिङ नेप्लिज कम्युनिटी एसोसिएसनको यही १७ अक्टुबर २०२५ मा दसैं तथा तिहार विशेष कार्यक्रम हुने भएको छ । पाकिस्तानी कम्युनिटी हलमा शुक्रबार दसैं, तिहार शुभकामना साँझ कार्यक्रम आयोजना गरिने कार्यक्रम सहसंयोजक महेन्द्र आलेले जानकारी दिनुभएको छ ।

कार्यक्रमको मुख्य आकर्षणहरुमा नेपालबाट आएका गायक राजनराज शिवाकोटी, गायिका देवी घर्ती मगर र मोडल तथा चर्चित डान्सर अस्मिता पुरीको प्रस्तुति रहेको छ । गायक शिवाकोटी सुर्के थैली खै, कुटुमा कुटु सुपारी दाना, गोजीमा दाम छैन, पूर्व पश्चिम रेल, फुलबुट्टे सारी जस्ता चर्चित गीतका सर्जक हुनुहुन्छ ।

यस्तै गायिका घर्ती मगरको मयाली,उही खोलीमा पानी,माया आउने बस,झलीको झलल,माकुर माकुर घुर जस्ता धेरै लोक तथा दोहोरी गीत चर्चित छन् । कार्यक्रममा स्थानीय कलाकारहरुको बेजोड प्रस्तुति रहने छ । डिजेमा दिपु गुरुङ हुनुहुन्छ ।

कार्यक्रम सॉझ ५ बजेबाट सुरु भएर ११ बजे समापन हुनेछ । कार्यक्रममा प्रवेश शुल्क १० पाउन्ड र १२ वर्ष मुनिको लागि नि:शुल्क गरिएको छ । साथै स्वादिष्ट नेपाली खानाको परिकारहरुबाट पनि भरपुर मनोरञ्जन लिन सकिने आयोजकले जनाएको छ।

कार्यक्रमको मुख्य संयोजक बालकृष्ण दाहाल (उपाध्यक्ष) रहनुभएको छ । कार्यक्रममा सपरिवारको गरिमामय उपस्थितिका लागि ग्रेटर रेडिङ नेपाली समाजका अध्यक्ष भिमसेन खड्काले निमन्त्रणा दिनुभएको छ ।