लन्डन । तमु समाज यूकेले बेलायतमा बसोबास गर्ने नेपालीमूलका ज्येष्ठ नागरिकहरूको जीवनस्तर अभिवृद्धि र सशक्तिकरण गर्ने उद्देश्यका साथ निःशुल्क प्रारम्भिकस्तरको अंग्रेजी र वेलबीइङ कक्षा सञ्चालन गरेको छ । ती कक्षाहरू सन् २०२५ अप्रिल ३ देखि हरेक बिहीबार बिहान १० देखि दिउँसो १ बजेसम्म तमु समाज यूके नेप्लिज कम्युनिटी सेन्टरमा सञ्चालन भएका थिए ।
कक्षा संयोजन अमृता थापाले गर्नुभएको थियो भने सल्लाहकारद्वय यमबहादुर गुरुङ र इमान घलेले व्यवस्थापकीय सहयोग गर्नुभएको थियो । यस अवधिमा सहभागीहरूलाई प्रत्येक सत्रमा निःशुल्क स्टेशनरी (पाठ्यपुस्तक तथा कलम) र जलपानसमेत व्यवस्था गरिएको थियो ।
गत १६ अक्टोबर बिहीबार बारहम पार्क, वेम्ब्लीस्थित तमु समाज यूके नेप्लिज कम्युनिटी सेन्टरमा कक्षा समापन समारोह गरिएको छ । नेशनल लटरी कम्युनिटी फन्डको आर्थिक सहयोगमा सञ्चालित यस कार्यक्रमको समापन समारोहमा लन्डन बरो अफ ब्रेन्टका मेयर काउन्सिलर रायन ह्याक प्रमुख अतिथिका रूपमा उपस्थित हुनुभएको थियो ।
मेयर आगमनका क्रममा तमु समाज यूकेकी अध्यक्ष बिन्दु कुमारी गुरुङ घले र संस्थापक अध्यक्ष चित्रबहादुर गुरुङले खादा र पुष्पगुच्छा अर्पण गरी स्वागत गर्नुभएको थियो । यस अवसरमा उहाँहरूले मेयर ह्याकलाई १४ मे २०२५ मा निर्वाचित भई ब्रेन्ट काउन्सिलको २०२५–२०२६ कार्यकालका लागि मेयरको जिम्मेवारी सम्हालेकोमा बधाई पनि ज्ञापन गर्नुभयो । ब्रेन्टको इतिहासमा २६ वर्षको उमेरमा सबैभन्दा कान्छा मेयर बनेका काउन्सिलर ह्याक ब्रन्डसबरी पार्क वार्डका लेबर पार्टीका प्रतिनिधि हुनुहुन्छ ।
समारोहमा मेयर ह्याकले प्रारम्भिक अंग्रेजी तालिम सफलतापूर्वक सम्पन्न गरेका नेपाली ज्येष्ठ नागरिकहरूलाई प्रमाणपत्र वितरण गर्दै उनीहरूको लगनशीलता र सिक्ने उत्साहको प्रशंसा गर्नुभयो । साथै, उहाँले कक्षा शिक्षिका अमृता गुरुङ थापा र व्यवस्थापन टोलीका सदस्यहरु सल्लाहकार यम गुरुङ, सल्लाहकार इमान घले, आजीवन सदस्य वलकृष्ण गुरुङ तथा कार्यसमिति सचिव क्याप्टेन तेसर जङ गुरुङलाई कार्यक्रम सफल बनाउन गरेको उल्लेखनीय योगदानका लागि आभार व्यक्त गर्दै कदरस्वरूप सम्मानपत्र प्रदान गर्नुभयो ।
कार्यक्रममा तमु समाज यूके अध्यक्ष बिन्दु कुमारी गुरुङ घले, संस्थापक अध्यक्ष चित्र बहादुर गुरुङ, उपाध्यक्ष भीम बहादुर गुरुङ, सल्लाहकार इमान घले र यमबहादुर गुरुङसहित अन्य समुदायिक अगुवाहरूको उत्साहजनक उपस्थिति थियो ।
अध्यक्ष घलेले ज्येष्ठ नागरिकहरूका लागि अंग्रेजी शिक्षाको आवश्यकतामा जोड दिँदै नेशनल लटरी कम्युनिटी फन्ड र प्रमुख अतिथिका रूपमा सहभागी भएका मेयर काउन्सिलर रायन ह्याकप्रति विशेष आभार व्यक्त गर्नुभयो । उहाँले स्वयंसेवी टोली र संस्थापक अध्यक्षले उक्त अनुदान प्राप्त गर्न गरेको प्रयासको पनि सराहना गर्नुभयो ।
संस्थापक अध्यक्ष चित्रबहादुर गुरुङले ज्येष्ठ सहभागीहरूलाई अंग्रेजी अध्ययनमा निरन्तर लागिरहन प्रोत्साहित गर्दै यसले दैनिक जीवनका कार्यहरु जस्तै यात्रा, किनमेल, स्वास्थ्य जाँच र परामर्शमा ठूलो मद्दत पुग्ने विश्वास व्यक्त गर्नुभयो ।
नेशनल लटरी कम्युनिटी फन्डको सहयोगमा सम्पन्न यो औपचारिक कार्यक्रम समाप्त भए पनि तमु समाज यूकेले ज्येष्ठ नागरिकहरूको हितलाई ध्यानमा राख्दै आगामी दिनमा पनि प्रत्येक बिहीबार अंग्रेजी भाषा र वेलबिइङ कक्षालाई निरन्तरता दिने प्रतिबद्धता जनाएको छ । कार्यक्रम संस्थाका संस्थापक अध्यक्ष चित्रबहादुर गुरुङको विशेष पहलमा सञ्चालन भएको थियो ।
उक्त समारोह आत्मीयता, खुशी र सामुदायिक एकताको भावनाले ओतप्रोत थियो । कार्यक्रममा सहभागी र अतिथिहरुले शिक्षा, सुस्वास्थ्य र सामाजिक एकताका लागि तमु समाज यूके र मेयर ह्याकले देखाएको प्रतिवद्धताप्रति आभार व्यक्त गर्नुभयो ।