नेपालमा कोरोना संक्रमणबाट दोश्रो व्यक्तिको निधन

काठमाडौँ । नेपालमा कोरोना संक्रमणबाट दोस्रो व्यक्तिको निधन भएको छ ।

बाँकेको नरैनापुरमा क्वारेन्टाइनमा रहेका २५ वर्षीय युवाको कोरोना संक्रमणबाट आइतबार बिहान मृत्यु भएको स्वास्थ्य तथा जनसंख्या मन्त्रालयले जनाएको छ ।

उनी पाँचदिन अघि भारतको मुम्बईबाट नेपाल आएका थिए ।

उनको मृत्युसँगै नेपालमा कोरोना संक्रमणबाट मृत्यु हुनेको संख्या दुई पुगेको छ । यसअघि सिन्धुपाल्चोककी एक २९ वर्षीया महिलाको कोरोना संक्रमणबाट निधन भएको थियो ।

बिहान एक्कासी स्वास्थ्यावस्था असामान्य भएपछि उनको क्वारेन्टाइनमै मृत्यु भएको गाउँपालिका नरैनापुरका स्वास्थ्य शाखा संयोजक मोइन खानले बताए । उनका अनुसार बिरामीलाई उपचारका लागि अस्पताल लैजान एम्बुलेन्स बोलाइए पनि एम्बुलेन्स पुग्नुअगावै युवकको मृत्यु भएको थियो ।

क्वारेन्टाइनमा बसेका युवकको मृत्यु भएपछि नरैनापुरबासी त्रसित हुन पुगेका छन् ।