नेपालमा धेरै कोरोना संक्रमित २० देखि ५० वर्षका

काठमाडौँ ।अन्य देशमा पाको उमेरका मानिसमा कोरोना संक्रमण ज्यादा देखिए पनि नेपालमा हालसम्म देखिएको संक्रमण भने २० देखि ५० वर्ष उमेर समूहमा बढी छ ।  स्वास्थ्य तथा जनसङ्ख्या मन्त्रालयका अनुसार २० देखि ५० वर्ष समूहकमा अत्यधिक संक्रमित रहेकका छन्  ।

यद्यपि संक्रमण सबै उमेर समूहलाई हुने सक्ने भएकाले सावधानी अपनाउन मन्त्रालयका प्रवक्त डा विकास देवकोटाले सबैलाई आग्रह गरे ।

प्रवक्ता डा. देवकोटाले हालसम्म पीसीआरबाट २२ हजार ६६४ र आरडीटीबाट ६२ हजार ३२७ जनाको कोरोना परीक्षण भएको जानकारी दिए । उनका अनुसार पीसीआरमार्फत बिहीबार मात्र एक हजार ३६३ जना र आरडीटीबाट दुईहजार आठ परीक्षण भएका छन् ।

यसैगरी अहिले क्वारेन्टाईनमा १५ हजार ६०० जना बसिरहेको उनले बताए भने काठमाडौंँमा छ र बाहिर २६६ जना गरी देशभर २७२ जना आइसोलेसनमा रहेको उल्लेख गरे ।

उनले हालसम्म कर्णाली बाहेक अरु छवटा प्रदेशका २२ जिल्लामा सङ्क्रमण देखिसकेको जानकारी दिए । सङ्क्रमितमध्ये पर्सा जिल्लामा ८५, कपिलवस्तुमा ३९, उदयपुर ३२, रुपन्देहीमा २८, बाँकेमा २५, काठमाडौँ ६, कैलाली ४, रौतहट ३, बारा ३, बाग्लुङ, चितवन, महोत्तरी, भक्तपुर, धनुषा, नवलपरासी, झापा, र सर्लाहीमा दुई दुई जना, सप्तरी, भोजपुर, कञ्चनपुर, धादिङ र बर्दियामा एक एकजना गरी कुल २४६ पुगेको छ ।