शनिबार, जेठ २४ २०७७ | Sat, June 06, 2020
नेपालको समय: १६:२२ | UK Time: 11:37

म नाथे कोरोना (कोभिड-१९)

वीनेपाली
२०७७ वैशाख ११ गते २३:१३

म अहिले एउटा अद्भूत अदृश्य शक्ति भएर
यस पृथ्वीमा सबैभन्दा नयाँ र नौलो
प्रकारको उधुम मच्चाउन चाहन्छु
जसरी एउटा गरिब कवि
फालिएका पुराना अखबारको स्तम्भ पढेर
नयाँ सरचना र नयाँ शैलीमा
कविता लेख्छ र उधुम मच्चाउँछ
म त्यसरी नै उधुम मच्चाउन चाहन्छु

जसरी एउटा गरिब चित्रकारले
मैलामा थुपारिएको चाङ्गबाट कार्डबोर्ड टिपेर
पेन्सिलले नयाँ शैलीमा मोनालिसाको चित्र
कोरेर उधुम मच्चाउँछ
म त्यसरी नै उधुम मच्चाउन चाहन्छु

जसरी एउटा गरिब सङ्गीतकारले
बीच बाटोमा माग्दै टोकरी बजाएर
एकदमै नयाँशैलीमा सङ्गीत सिर्जना गर्छ
र उधुम मच्चाउँछ
म त्यसरी नै उधुम मच्चाउन चाहन्छु

विज्ञान र प्रविधिको काँधमा चढेर
आणविक भट्टीको निर्माण गरेर
दम्भको नशामा लठ्ठ हुँदै
सबै पृथ्वी कब्जामा लिएर
शक्ति प्रदर्शन गर्न आतुर मानिसको
सेखी झारेर म उधुम मच्चाउन चाहन्छु

प्रतिपल चिकित्सा विज्ञानको
चमत्कारसँगै मलेरिया, सार्स, स्वाइनफ्लु, बर्डफ्लु
जस्ता अनेकौ रोगब्याधीको निवारण गर्दै
अघि बढिरहेको मानिसलाई
आतङ्कित तुल्याएर उधुम मच्चाउने
मेरो लक्ष्य अधूरो बनाएर
एकदिन विजयको चुचुरोमा उभिएर
आनन्दको सास फेर्दै मानिसहरु भन्नेछन्
ए त्यो नाथे पुरानो रोग कोरोना !

प्रतिक्रिया

सम्बन्धित सामाग्री

फेसबुक