बेलायतसहित युरोपेली देशका ९ राजदूतले एक महिनाको तलव दिने

लन्डन । युरोपेली मुलुकमा रहेका ९ नेपाली राजदूतले आफ्नो एक महिनाको तलब सरकारी कोषमा दाखिला गर्ने भएका छन् ।

उनीहरुले नेपाल सरकारको ‘कोरोना भाइरस संक्रमण रोकथाम, नियन्त्रण तथा उपचार कोष’ लाई सहयोग गर्ने घोषणा गरेका हुन् ।

लन्डनस्थित नेपाली दूतावासका उपनियोग प्रमुख एवं प्रवक्ता शरदराज आरनका अनुसार बेलायतका लागि नेपाली राजदूत डा. दुर्गाबहादुर सुवेदी, बेल्जियमका लोकबहादुर थापा, फ्रान्सका दिपक अधिकारी, जर्मनीका रमेश खनाल, रसियाका ऋषि घिमिरे, स्पेनकी दावा शेर्पा, डेनमार्कका युवनाथ लम्साल, स्वीजरल्याण्डका मणि भट्टराई र अष्ट्रियाका प्रकाश सुवेदीले सहयोग घोषणा गरेका हुन् ।

सरकारले एक साताको तलव दिन परिपत्र गरेपनि राजदूतहरुले एक महिनाकै तलब जम्मा गर्ने निर्णय गरेको प्रवक्ता आरनले जनाए ।

९ वटै दूतावासमा रहेका डिप्लोम्याट्सहरुले पनि एक साताको तलब उक्त कोषमा जम्मा गर्ने भएका छन् ।

उता, मध्यपूर्व तथा खाडी देशका ९ नेपाली राजदूत, दक्षिण पूर्व एसिया तथा प्रशान्त क्षेत्रमा कार्यरत ४ राजदूत, उत्तर एवं दक्षिण अमेरिकी देशका ५ राजदूत तथा नियोग प्रमुखहरुले पनि सहयोग घोषणा गरेका छन् ।