प्रोफेसर सुवेदीलाई अर्को महाविद्यावारिधि

प्राध्यापक सुवेदी

लण्डन । प्रोफेसर सूर्यप्रसाद सुवेदीलाई बेलायतको हल विश्वविद्यालयले मानार्थ महाविद्यावारिधि उपाधि प्रदान गरेको छ ।
सुवेदीलाई उनले प्राज्ञिक क्षेत्र र अन्तर्राष्ट्रिय कानून र मानवअधिकार कानूनको विकासमा दिएको योगदानको कदर गर्दै सो उपाधि प्रदान गरिएको जनाइएको छ ।

विश्वविद्यालयका उपकुलपतिबाट सो सम्बन्धी पत्र पाउँदा आफू हर्षित भएको प्रा. सुवेदीले बताए । सो विश्वविद्यालयबाट करिब ३० वर्षअघि सुवेदीले विशिष्ट श्रेणीमा प्रथम भई अन्तर्राष्ट्रिय कानूनमा स्नातकोत्तर गरेका थिए । त्यसपछि उनले अक्सफोर्ड विश्वविद्यालयबाट विद्यावारिधि गरेका थिए ।

गत वर्ष सुवेदीलाई अक्सफोर्ड विश्वविद्यालयले पनि महाविद्यावारिधि उपाधि प्रदान गरेको थियो भने यसवर्ष उनको नाममा दुईवटा वार्षिक पुरस्कार स्थापना गरेको छ ।

नेपालको लमजुङमा जन्मिएका सुवेदीले काठमाडौँको ल क्याम्पस हुँदै बेलायतको हल र अक्सफोर्ड विश्वविद्यालयमा अध्ययन गरेका छन् । सुवेदीले विभिन्न देशका सातवटा विश्वविद्यालयमा प्राध्यापन गर्ने गरेका छन् । उनले नेपाल र बेलायत सरकारका अतिरिक्त अन्य संघसंस्थालाई कानूनी सल्लाह दिएका छन् ।

उनका आठवटा पुस्तक र अनुसन्धानमूलक लेखहरु अन्तर्राष्ट्रिय जर्नलहरुमा प्रकाशन भएका छन् । उनका कृतिहरु विभिन्न भाषामा प्रकाशित छन् ।

प्रतिक्रिया

सम्बन्धित सामाग्री