बिहीबार, चैत २७ २०७६ | Thu, April 09, 2020
नेपालको समय: ०८:३१ | UK Time: 03:46

कोरोना: अब त अलप हुने कि !

डा बच्चु कैलाश कैनी
२०७६ चैत ७ गते १६:१८
Dr Bachhu Kaini

डा बच्चु कैलाश कैनी

कोरोना तिमी अदृश्य छौ
तर शक्तिशाली छौ
विश्वको महाशक्तिहरु
तिमीसंग डराएर
आफैं नाकाबन्दी गरेका छन्
तिमीलाई हराउन र लडाउन
तिम्रो उपस्थिति निस्तेज पार्न
अरबौं डलर खर्च गरेका छन्
तर तिमी अझै बलियो हुँदै
रात दुई गुणा, दिन चार गुणाको दरमा
आफ्नो बिस्तार गर्दैछौ ।

विश्वलाई घेराबन्दी पार्ने तिमी कोरोना
आम मानिसले तिम्रो प्रभाव देखेपनि
तिमीलाई देखेका छैनन्
मानिसहरुलाई तिम्रो आकृति र रंग हेर्ने मन छ
सबैको मनमा कौतुहल छ
प्रश्न माथि प्रश्नहरु छन्
तिमी कस्तो छौ ?
किन यति निर्दयी बनेको तिमी कोरोना ?
तिम्रो मनमा अलिकति पनि दया छैन है ?
सबैलाई त्रसित पार्ने तिम्रो नियत के हो ?
कति समयसम्म हाम्रो पिछा गर्ने ?
कति तहसनहस गर्ने?
आदी इत्यादी प्रश्नका पोकोहरु बोकेर
मनमा भय र अनिश्चितता बोकेर
सबै त्रसित बनेका छन्
केवल तिम्रो उपस्थितिले
मर्ने र बाँच्ने दोसाधमा बसेका छन् ।

कोरोना तिम्रो उपस्थितिले
अनिश्चय छ चारैतिर
मनमा भय छ
जीवनका गन्तव्यहरु अबरुद्ध छन्
विकासको गति ठप्प भएको छ
कयौंको घरबार गएको छ
कोरोना तिमी अदृश्य भएपनि
तिम्रो प्रभाव, रवाफ र हैकम
सबैतिर प्रष्ट देखिएको छ
तिम्रो उपस्थितिले
कतिको ज्यान गएको छ
कति अस्पतालको शैयामा छटपटाएका छन्
धेरैको बेहाल भएको छ
आफ्नो ब्यापार ब्यबसाय गुमाउनेको के कुरा गर्नु ?
जागिरबाट हात धुनेहरुलाई कति गन्नु ?
कोरोना तिम्रो यो निर्दयी स्वरुपले गरेको बर्वादीले
अब सिमा नाघिसक्यो
हाम्रो प्रार्थना छ
सादर बिन्ति छ
कोरोना कृपया अब तिमी अलप भइदेउ
विश्वबाट टाढा गइदेउ
हाम्रो प्रार्थना सुनेर
सधैको लागि बिदा भइदेउ ।

७  चैत २०७६, आइतबार (२० मार्च २०२०)
डार्टफोर्ड, बेलायत 

प्रतिक्रिया

सम्बन्धित सामाग्री

फेसबुक