लण्डन । ब्रिटेन नेपाल च्याम्बर अफ कमर्सका अध्यक्ष डा. कपिल रिजालले बेलायतमा संकलन गरिएको १ लाख रुपियाँ काठमाडौँस्थित माया घरलाई हस्तान्तरण गरेका छन् ।
गत २६ जनवरीका दिन होली काउ फाइन डाइन रेस्टुरेन्टमा आयोजित कार्यक्रममा गैर आवासीय नेपाली संघका निवर्तमान केन्द्रिय उपाध्यक्ष कुल आचार्यको पहलमा उक्त रकम संकलन गरिएको थियो ।
एउटा मानवीय कार्यका लागि सहयोग जुटाउन पाउंदा आफुलाई खुशी लागेको आचार्यले बताए । उनले सबै सहयोगदाताहरुलाई धन्यवाद पनि दिए ।
कलंकीमा रहेको माया घरले २६ जना निसहाय बालबालिकालाई आश्रय तथा पठनपाठनको व्यवस्था गर्दै आएको छ । उक्त घरले अप्रत्यक्ष रुपमा ५० भन्दा बढी अन्य बालबालिकालाई पनि सघाएको छ ।
