नेपालका क्यान्सर पीडित बालबालिकाका लागि जुट्यो १९ हजार पाउण्ड

लन्डन । लिभरपुल नेपाली समाज बेलायतले ‘So The Child May Live’ भन्ने संस्थालाई ११ हजार 
स्टर्लिङ पाउण्ड हस्तान्तरण गरेको छ । बुधबार नेपाली समाजका प्रतिनिधिहरु संकलित ८ हजार पाउण्ड लिएर मेयर अफिस पुगेका थिए । नेपालका क्यान्सर पीडित बच्चाहरुका लागि यो रकम उठाइएको सुनेपछि मेयर प्रभावित भए र उनको कार्यालयकातर्फबाट पनि ३ हजार पाउण्ड प्रदान गरे । यसले सहयोग रकम ११ हजार पुग्यो । त्यसमध्ये ८ हजार पाउण्ड बेलायत सरकारले दोब्बर गरिदिने हुनाले सहयोग रकम कम्तिमा १९ हजार पाउण्ड पुग्ने भएको छ ।

नेपालको कान्ति बाल अस्पताललाई निरन्तर सहयोग गर्दै आएको संस्था हो ‘So The Child May Live’ । सो संस्था लिभरपुलमा रहेको Alder Hey बाल अस्पतालका नर्स तथा डाक्टरहरूको सक्रियतामा स्थापना भएको हो । संस्थाले यो वर्ष नेपालका क्यान्सर पीडित बालबालिकाको मृत्युदर घटाउन आवश्यक पर्ने सामाग्री तथा उपचारका लागि आर्थिक संकलन अभियान शुरू गरेको थियो ।

लिभरपुल नेपाली समाजले यस्तो पवित्र अभियानमा आफ्नो पनि साथ र सहयोग हुनुपर्ने आवश्यकता महशुस गरि गत २४ नोभेम्बर २०१९ मा च्यारिटी डिनर तथा सांस्कृतिक कार्यक्रम आयोजना गरयो । उक्त कार्यक्रममार्फत संस्थाले लिभरपुलस्थित विभिन्न व्यक्ति र संस्थाहरुलाई आर्थिक सहयोग गर्न आव्हान गरेको थियो ।

कार्यक्रममा बेलायतको बिभिन्न शहरमा बस्ने नेपाली, बेलायती तथा भारतीय नागरिकहरुको समेत उपस्थिति थियो । एनआरएनए युके, हेल्थ एक्सचेञ्च नेपाल, नेपलिज डाक्टर एसोसिएसन युकेबाट समेत सहयोग प्राप्त भएको थियो । मर्सी स्कूल अफ एनेस्थेसिया, लिभरपुलले सबैभन्दा धेरै रकम ५ हजार पाउण्ड सहयोग गरेको थियो ।

सोचे भन्दा धेरै रकम उठेकामा ‘So The Child May Live’ का प्रतिनिधिहरु हर्षित भए र लिभरपुल नेपाली समाजप्रति कृतज्ञ थिए ।

नेपाली समाजकोतर्फबाट सल्लाहकारद्वय डा. शम्भु आचार्य र भक्त गुरुङ, अध्यक्ष देउमान इजम, उपाध्यक्ष नरेश बिष्ट, सचिव शिवराज पन्त र कोषाध्यक्ष हरिराम अर्यालको टोली १५ जनवरी बिहान साढे दश बजे मेयरको कार्यालय पुगेको थियो ।

‘So The Child May Live’ का प्रतिनिधिहरु यही जनवरीभित्रै नेपाल गई ‘वर्ल्ड चाइल्ड क्यान्सर’ संग सहकार्य शुरू गर्नेछन् ।
विकसित मुलुकहरुमा क्यान्सर पीडितमध्ये ८० प्रतिशतसम्म बालबालिका बांच्न सक्छन् भने नेपाल लगायत विकासोन्मुख मुलुकमा पीडितमध्ये १० प्रतिशतमात्र बांच्न सफल हुन्छन् । यही तथ्यांकलाई मध्यनजर गर्दै च्यारिटी संस्था ‘वर्ल्ड चाइल्ड क्यान्सर’ ले पिछडिएका मुलुकहरुमा सहयोग अभियान शुरू गरेको हो । यो अभियानको नाम ‘क्लोज द क्यान्सर ग्याप’ हो । यस अभियान अन्तर्गत नेपालका सातै प्रदेशका क्यान्सर पीडित बालबालिकालाई सहयोग गर्ने लक्ष्य राखिएको छ ।