लन्डन । यूके नेपाल फ्रेण्डसीप सोसाइटीको समन्वयमा बर्नमाउथस्थित इसकोफिएर क्याटरिङ कलेजमा नेपाली खानासम्बन्धि प्रदर्शनी भएको छ । गत ७
जनवरीमा सोसाइटीका आर्टस् सेक्सन अफिसर दीपक ताम्राकारले उक्त कलेजका २६ विद्यार्थीलाई दुई घण्टाजति नेपाली ‘कुजिन’ पकाउने तरिका सिकाए र खाना प्रदर्शनी गरे । यस क्षेत्रमा १५ वर्षभन्दा बढिको अनुभव संगालेका ताम्राकार सोसाइटीको ‘यूके नेपाली कल्चरल एण्ड सोसल हेरिटेज प्रोजेक्ट’ अन्तर्गत नेपाली कुजिन कम्पोनेन्ट वेवसाइट अनि ‘इ-बुक’ का प्रमुख सहयोगी हुन् ।
सो अवसरमा सोसाइटीका चिफ एक्जुकेटिभ अफिसर अलान मर्सेल सान्का, कलेजका सेफ ट्युटर डेभिड मार्सल, सेफ लेक्चरर मार्क अल्डरम्यान लगायत सहभागी थिए ।
प्रदर्शनीबाट उक्त कलेजका विद्यार्थीलाई नेपाली खानाबारे जानकार हुने मौका मिलेको सोसाइटीका सिइओ अलानले बताए । दक्षिण एसियाली खानामा नेपाली खानाको आफ्नै विशेषता रहेको र बेलायतमा हजारौं सेफहरु कार्यरत भएपनि नेपाली खानाको प्रवर्धन पर्याप्त हुन नसकेको आलनको बुझाइ छ । यस खालका प्रदर्शनीले नेपाली खाना प्रचार प्रसारमा थप बल पुग्ने आलन बताउंछन् ।
यूके नेपाल फ्रेण्डसीप सोसाइटीले बेलायतमा नेपाली कला, संस्कृति एवं पहिचानको जगेर्ना गर्न आफ्नो तर्फबाट निरन्तर काम गरिरहेको छ । सोसाइटीले ‘नेपाल भ्रमण वर्ष-२०२०’ अभियानमा सघाउने वाचा पनि गरेको छ ।
