लण्डन । पहिचान पुरस्कार कोषले वरिष्ठ साहित्यकार खगेन्द्र संग्रौलालाई ‘पहिचान सम्मान’ प्रदान गर्ने भएको छ ।
संग्रौलाले लेखनमार्फत सीमान्तकृत समुदायको हक अधिकार स्थापित गराउन निरन्तर योगदान दिएकाले सो सम्मान दिन लागिएको कोषले जनाएको छ ।
कोषका संस्थापक नरेश काङमाङ राईका अनुसार संग्रौलालाई आगामी वैशाख वा चैत्रमा काठमाडौँमा एक कार्यक्रम गरी सो पुरस्कार वितरण गरिने छ । पुरस्कारका साथमा ताम्रपत्र र ४ लाख २ हजार २ रुपियाँ प्रदान गरिने छ ।
प्रत्येक वर्ष वितरण हुँदै आएको पहिचान पुरस्कार कोषले स्थापनाको पाँचौं वर्षगाँठका अवसरमा ‘पहिचान सम्मान’ प्रदान गर्न लागेको हो । कोषले हरेक वर्ष पुरस्कार र प्रत्येक पाँच वर्षमा पहिचान सम्मान दिने गर्दछ ।
कोषले यसअघि अगाडि चारवटा कृतिहरुलाई पुरस्कार प्रदान गरिसकेको छ । राजन मुकारुङको ‘फेरिंदो सौन्दर्य’, अर्जुन खालिङको ‘गोयाङको सुगन्ध’ र यज्ञशको ‘भुइयाँ’ र उन्मुक्त पुस्ताको ‘आफर’, सरस्वती प्रतीक्षाको ‘नथिया’ ले पहिचान पुरस्कार पाइसकेका छन् ।
