बेलायतमा ‘६ माया छपक्कै’ देखाइने

लन्डन । नेपालमा सर्वाधिक लोकप्रिय फिल्म ‘६ माया छपक्कै’ अब बेलायतका दर्शकमाझ आउने भएको छ । नेपलिज इन्टरटेनमेन्ट यूकेले जनवरी ५ तारिख आइतबार अल्डरसटमा फिल्म प्रदर्शन गर्न लागेको हो ।

नेपलिज इन्टरटेनमेन्ट यूकेका तारा गर्बुजाले एम्पायर हल अल्डरसटमा अपरान्ह ३.३० बजे फिल्म प्रदर्शन हुने जानकारी दिंदै नेपालमा लोकप्रिय फिल्म हेरेर मनोरन्जन लिन सबैलाई निम्तो दिएका छन् ।

‘छ माया छपक्कै’ दीपेन्द्र लामाले निर्देशन गरेका हुन् जसमा कलाकारहरु दीपकराज गिरी, केकी अधिकारी, प्रकाश घिमिरे, जितु नेपाल, केदार घिमिरे, सुपुष्पा भट्ट, रमा थपलिया, अनुराग कुंवर, सविन बांस्तोला, शिशिर वाङ्देल लगायतको भूमिका छ ।

फिल्मले राजनीतिलाई पूर्णतः नकारात्मक दृष्टिकोणबाट व्याख्या गरेको छ । फिल्मले गाउंमा चलिरहेको दलीय राजनीति प्रस्तुत गर्दै गाउं विकासमा दलको भर पर्न नहुने सन्देश दिएको फिल्म प्रदर्शक मध्ये एक बीरेन खड्काले जनाए  ।