लन्डन । भारतले नेपालको लिपुलेक, लिम्पियाधुरा, कालापानी लगायत भूभाग आफ्नो नक्सामा एकतर्फी राखेको विरोधमा लन्डनमा गरिने प्रदर्शन तयारी पुरा भएको छ ।
गैर आवासीय नेपाली संघ बेलायतले २ डिसेम्बर, सोमबार १२.३० देखि १.०० बजेसम्म लण्डनस्थित भारतीय हाइ कमिसन अगाडि प्रदर्शन तयारी गरेको हो । तर, उक्त कार्यक्रम कुनै मार्च पास नभइ ‘स्टेटिक’ अर्थात निश्चित स्थानमा आयोजना गरिने विरोध कार्यक्रम भएको संघले जनाएको छ । ‘हामी तोकिएको समय र स्थानमा उपस्थित भएर शान्तिपूर्ण विरोध प्रदर्शन गर्दै विरोधपत्र बुझाउने छौं’- एनआरएनए यूके महासचिव फडिन्द्र भट्टराईले भने, ‘स्थानीय प्रहरी प्रशासनबाट सोका लागि अनुमति लिइ सकिएको छ । तर, कार्यक्रम अनुशासित र मर्यादित ढंगले संचालन हुनेछ । नारावाजी, होहल्ला र उत्तेजनालाई निषेध गरिएको छ । अहिले लन्डनको सुरक्षा व्यवस्थामा कडाई गरिएकाले पनि पुलिस प्रशासनले तोकेको सीमा नाघेर गरिएको क्रियाकलापपछि हुने नतिजामा संस्था जिम्मेवार हुने छैन् ।’
अध्यक्ष पुनम गुरुङले विरोध कार्यक्रमका लागि बेलायतवासी नेपालीलाई मध्यान्ह १२ बजे उपस्थित भइदिन अपिल गरेकी छन् । ‘यो राष्ट्रिय मुद्दा भएकाले व्यक्तिगत, जातीय, राजनीतिक वा अन्य दृष्टिकोणबाट नहेरिदिन हाम्रो आग्रह छ’- उनले भनिन् ।
उक्त कार्यक्रमका लागि बेलायतका विभिन्न शहरमा बसेका नेपाली लन्डन आउने बताइएको छ । मिडल्याण्डबाटमात्र झण्डै एकसय २५ जना आउने त्यहांका नेपालीले जनाएका छन् ।
