लन्डन । डिसेम्बर दोश्रो साता हुने ‘मिस वर्ल्ड प्रतियोगिता २०१९’ मा प्रतिष्पर्धा गर्न हाल लन्डन रहेकी मिस नेपाल अनुष्का श्रेष्ठले लन्डनस्थित नेपाली राजदूत डा. दुर्गाबहादुर सुवेदीसंग भेटघाट गरेकी छन् ।
भेटमा बेलायतमा नेपालीहरुको उपस्थिति, नेपाल ब्रिटेन सम्बन्धको इतिहास र मिस नेपालले ‘नेपाल भ्रमण वर्ष २०२०’ का लागि खेल्न सक्ने भूमिका एवं नेपालको राष्ट्रिय प्रतिनिधिहरूका रूपमा आफ्नो क्षमता सक्दो कसरी प्रदर्शन गर्ने भन्ने विषयमा लामो छलफल भएको अनुष्काले जनाएकी छन् ।
‘मैले मेरो बुद्धि विवेक र क्षमताले सक्ने गरि मिस वर्ल्डमा आफूलाई बलियो उपस्थिति जनाउने महामहिमसंग कुरा राखें । मलाई सहयोग र हौसल्ला प्रदान गर्नुभएकोमा नेपाली राजदूतावास परिवार र महामहिम राजदूतज्यूप्रति आभार प्रकट गर्न चाहन्छु’-उनले आफ्नो फेसबुक पेजमा लेखेकी छन् ।
राजदूत सुवेदीले शनिबार दूतावास भवनमा आयोजना गरेको कार्यक्रममा आफू सम्मानित भएको पनि उनले उल्लेख गरेकी छन् ।
मिस वर्ल्ड प्रतियोगिता यही डिसेम्बर १४ तारिख लन्डन एक्सेलमा हुंदैछ । अनुष्का विगत १० दिनदेखि प्रशिक्षण र विभिन्न विद्याका प्रतियोगितामा सहभागी हुंदै अन्य प्रतियोगीहरुबीच नेपाल चिनाउने प्रयत्न गरिरहेकी छन् ।
तस्विर- शंकर श्रेष्ठ/प्रोडक्सन थ्री
