बेलायतका सार्की/मिजारहरुको संस्था खुल्यो, अध्यक्षमा धन सार्की

लण्डन । बेलायतका नेपाली दलित जाती सार्की/मिजारहरु संगठित भएका छन् । उनीहरुले ‘नेपाली वेलफेयर सोसाइटी युके’ गठन गरेका हुन् । गत २४ नोभेम्बर आइतबार हन्स्लो वेष्ट, लण्डनस्थित स्पोर्टस् क्लबमा सम्पन्न भेलाले धनबहादुर सार्कीको अध्यक्षतामा संस्था गठन गरेको हो । सार्की सिर्जनशिल नेपाली समाज युकेका निवर्तमान अध्यक्ष हुन् ।

नयाँ कार्यसमितिको उपाध्यक्षमा पूर्णबहादुर नेपाली, महासचिव शर्मिला नेपाली, सचिव शमसेर नेपाली, कोषाध्यक्ष थमबहादुर रोका र सह-कोषाध्यक्षमा किरण नेपाली चयन भएका छन् । 

त्यस्तै, सदस्यहरुमा आशा देवी रोका, धबीन्द्र बौडेल र बुद्धि बहादुर रोका चयन भएका छन् । भेलाले सोसाइटीको वरिष्ठ सल्लाहकारमा गोपाल रोकालाई चयन गरेको छ । 

कार्यक्रममा सोसाइटीका जेष्ठ नागरिक श्यामबहादुर सार्की, वरिष्ठ सल्लाहकार गोपाल रोका लगायतले नयाँ कार्यसमितिको सफल कार्यकालको शुभकामना सहित बधाई दिए । 

त्यस्तै, सोसाइटीका वरिष्ठ सल्लाहकार रोकाले नवनिर्वाचित अध्यक्ष लगायत कार्यसमितिका पदाधिकारी र सदस्यहरुलाई पद तथा गोपनीयताको शपथ गराएका थिए । 

साथै, उक्त भेलाले पहिलो साधारणसभा तथा अन्तर्राष्ट्रिय जातीय रंगभेद दिवस आगामी २१ मार्च २०२० का दिन विविध कार्यक्रमका साथ मनाउने निर्णय समेत गरेको छ । 

धनबहादुर सार्कीको संयोजकत्वमा सम्पन्न उक्त भेलामा सहभागीहरुले समाजको आवश्यकता र एकता लगायत बिषयमा आ- आफ्ना धारणा राखेका थिए । 

आफ्ना सदस्यहरुबीच सुख–दुःख बाँड्ने, सहयोग आदानप्रदान लगायत उद्देश्यका साथ सोसाइटी स्थापना भएको हो । बेलायतमा स्थायी तथा अस्थायी रुपमा बसोबास गरिरहेका नेपाली र आफ्नो समुदायका सदस्यहरुको हकहित, कल्याण एवं पहिचानका लागि संस्थाको आवश्यकता महसुस भई संस्था स्थापना गरिएको जनाइएको छ । भेलामा संयोजक सार्कीले सार्की समुदायबारे जानकारी गराएका थिए । 

कार्यक्रमको अन्त्यमा नवनिर्वाचित अध्यक्ष एवं भेला संयोजक धनबहादुर सार्कीले सहभागी सबैलाई धन्यवाद दिंदै नवनिर्वाचित कार्यसमितिलाई बधाई दिए ।