पत्रकारहरुलाई अमर्यादित टिका टिप्पणी नगर्न चेतावनी

लन्डन-  नेपाल पत्रकार महासंघ बेलायतले युकेमा कार्यरत पत्रकारहरुप्रति विना कुनै आधार सामाजिक संजालमा अमर्यादित टिका टिप्पणी नगर्न चेतावनी दिएको छ ।

महासंघ बेलायत शाखाका महासचिव संजयभक्त कंडेलले शुक्रबार एक विज्ञप्ति जारी गरी भर्खरै सामाजिक सञ्जाल फेसबुकमा रामशरण सिंखडा, इन्द्र घोताने र रञ्जिता सेनका नाममा प्रकाशित ब्यक्तिगत विचार, स्टाटसलगायत अमर्यादित भाषा, टिकाटिप्पणीले दुःखी बनाएको जनाएका छन् ।

“सबै संघसंस्था र व्यक्तिसंग वार्ताको माध्यमबाट नै सम्पूर्ण असमझदारीहरू व्यवस्थित गर्ने माध्यम रहँदा रहँदै पनि अस्वस्थ र उत्तेजित ढङ्गबाट सञ्जालमा छताछुल्ल हुनु आफैमा दुर्भाग्यपूर्ण हो र अब उप्रान्त यसरी प्रस्तुत नहुन सम्बन्धित पक्षलाई नेपाल पत्रकार महासंघ, बेलायत सचेत गराउन चाहन्छ”- वक्तव्यमा छ।

‘नेपाल पत्रकार महासंघ बेलायत सबै विचार, समूह, वर्ग, भाषा, धर्म, जाति र अन्यलाई सम्मान गर्दै समव्यवहारमा नेपाल र विश्वभरि नै स्वस्थ र जानकारीमूलक सूचना प्रवाह गर्ने स्वतन्त्र पत्रकारहरुको साझा संस्था हो र यसैमा विश्वास राख्दछ । तर पनि समय समयमा यस संस्थासंग आवद्ध पत्रकार मित्र र पदाधिकारीहरु माथि हुने विभेद, अन्यायपूर्ण र असामाजिक व्यवहारको नेपाल पत्रकार महासंघ बेलायत खेद प्रकट गर्दछ’-वक्तव्यमा भनिएको छ ।

‘चित्त नबुझेका कुरा र व्यवहारलाई आपसी समझदारी वा कानुनी तवरबाट समाधान गर्ने प्रशस्त मार्ग हुँदा हुँदै पनि सामाजिक सञ्जालमा तल्लो स्तरको भाषा प्रयोग गरी गाली गलौज र पेशाप्रति नै अमर्यादित व्यवहार गर्ने जो कोहीको पनि नेपाल पत्रकार महासंघ बेलायत निन्दा गर्दछ । पेशा र श्रमको अर्थ, मर्यादा र महत्वलाई आफ्नो खुशी र स्वार्थमा व्याख्या गरी सामाजिक सञ्जाल, सभा कतै पनि असभ्य, अराजक नबनी दिन नेपाल पत्रकार महासंघ बेलायत अनुरोध गर्दछ’-वक्तव्यमा उल्लेख छ-‘पत्रकार र पत्रकारिताको सम्पूर्ण समस्या निराकरण गर्ने आधिकारीक र कानुनी संस्था रहेको सर्वविदित छ । यस अलावा पनि पत्रकार साथीहरूको सुरक्षा, सम्मान र मर्यादालाई कायम राख्न नेपाल पत्रकार महासंघ बेलायत सक्षम र कटिवद्ध रहेको र आवश्यक परे जस्तो सुकै कठोर कदम चाल्न पनि पछि नहटने अवगत गराइन्छ ।’