लन्डन- नेपालको प्रदेश नम्बर ३ की प्रमुख अनुराधा कोइरालाले नेपालमा शिक्षालाई अनिवार्य बनाउनुपर्ने र आफ्ना बालबालिका स्कुल नपठाउने अभिभावकविरुद्ध कानूनी कारवाही गर्नुपर्ने जनाएकी छन् ।
लन्डनस्थित नेपाली दूतावासद्वारा बिहिबार बेलुका आफ्नो सम्मानमा आयोजित एक समारोहलाई सम्बोधन गर्दै कोइरालाले आफूसंग कार्यकारी अधिकार नभए पनि आफूले प्रदेश नम्बर ३ का मुख्यमन्त्री तथा प्रदेश सरकारलाई गुणस्तरीय शिक्षामा जोड दिन सुझाव दिएको बताइन् ।
‘प्रदेश ३ सरकारले सबै सार्वजनिक विद्यालयहरुमा परामर्शदाताको व्यवस्था गर्नुका साथै छात्र-छात्राहरुका लागि छुट्टाछुट्टै शौचालयको व्यवस्था गर्न लागेको छ’-उनले बताइन् ।
माइती नेपालकी संस्थापक पनि रहेकी कोइरालाले अहिले नेपालबाट भारत, बंगलादेश तथा श्रीलंका हुँदै द्वन्द्वग्रस्त मुलुकहरु तथा अफ्रिकामा पनि चेलीबेटी बेचबिखन गर्ने क्रम बढेर गएको जनाइन् । उनले लैंगिक भेदभाव, अशिक्षा, बेरोजगारी, खुला सीमा तथा गरीवी जस्ता कारणले चेलीबेटी बेचबिखन हुने गरेको बताउंदै यस्तो समस्यासंग जुध्न सबैलाई हातेमालो गर्न आग्रह गरिन् ।
श्रीमति कोइरालालाई स्वागत गर्दै बेलायतका लागि नेपालका राजदूत डा. दुर्गाबहादुर सुबेदीले अनुराधा कोइरालाको सम्पूर्ण जीवन सेवाभावको अनुपम उदाहरण भएको बताए । उनले कोइरालाले हजारौं नेपाली चेलीलाई बेचबिखनबाट जोगाएर उनीहरुलाई नयां जीवन दिएको स्मरण गरे ।
उनले क्विन सोफिया अवार्ड, मदर टेरेसा अवार्ड, युनिफेम अवार्ड, सीएनएन हिरो तथा भारतको पद्म श्री पुरस्कार पाउने पहिलो नेपाली र पहिलो विदेशीको रुपमा श्रीमती कोइरालाले नेपालको नाम उंचो पारेको बताए । उनले दीपावली तथा छठ पर्वको अवसरमा बेलायत, आयरल्याण्ड तथा माल्टामा बसोबास गर्ने सबै नेपालीलाई शुभकामना पनि दिए ।
सो समारोहमा माइती नेपालका अध्यक्ष विश्व खड्का, चलचित्र निर्देशक नारायण पुरी, चलचित्र निर्माता उद्धव पौडेल लगायतका व्यक्तित्वहरुको सहभागिता थियो । कार्यक्रममा चर्चित गजल गायक राज सिग्देल, गायिका सितु खरेल तथा शर्मिला बर्देवाले लोकप्रिय गीत/गजल सुनाएका थिए ।
