लन्डन । तमु समाज युकेले जेष्ठ नागरिकहरुका निम्ति अंग्रेजी भाषा प्रशिक्षण दिएको छ । लन्डन वेम्बलीको बरहाम पार्कस्थित आफ्नै कम्युनिटी हलमा नेपाली मुलका जेष्ठ नागरिकहरुका निम्ति दिइएको २१ हप्ते प्रारम्भिक अंग्रेजी भाषा प्रशिक्षण गत जुलाई १९ तारिक समापन गरिएको हो ।
हरेक शुक्रबार सञ्चालन गरिएको उक्त अंग्रेजी भाषा प्रशिक्षण गत १ मार्च २०१९ मा शुभारम्भ गरिएको थियो । समापन समारोहमा प्रशिक्षण पुरा गरेका ४२ जना सहभागी जेष्ठ नागरिक एवं दिदीबहिनीलाई प्रमुख अतिथि काउन्सिलर सकिब बटले प्रमाणपत्र प्रदान गरे ।
तमु समाज युकेको आयोजना र नेशनल लट्री फन्डको आर्थिक प्रायोजनमा सञ्चालित प्रशिक्षणमा सहभागीले अंग्रेजी भाषा सिकेर बेलायत बसाईमा बेलायती जीवन पद्धति बुझ्न सहज भएको बताएका छन् ।
तमु समाज युकेका उपाध्यक्ष शिवकुमार गुरुङको सभापतित्व र लन्डन बरो अफ ब्रेन्टका काउन्सिलर सकिब बटको प्रमुख आतिथ्यमा सम्पन्न समापन समारोहको संयोजन तथा सञ्चालन भाषा प्रशिक्षणका संयोजक तथा तमु समाज युके नेप्लिज कम्युनिटी सेन्टरका प्रवन्धक बाबुराम गुरुङले गरेका थिए ।
समापन समारोहमा तमु समाज युकेका पूर्व अध्यक्ष शिवशरण गुरुङ, उपाध्यक्ष कन्यप्रसाद गरुङ, सल्लाहकार तथा नेपलिज कम्युनिटी सेन्टका सह-प्रवन्धकद्वय यामबहादुर गुरुङ र इमान घले, सल्लाहकार सुवसिङ गुरुङ बीइएम, भाषा प्रशिक्षक बिसु गिरी लगायत प्रशिक्षार्थी आमा, दिदीबहिनीको उपस्थिति थियो ।
कार्यक्रममा संयोजक तथा सञ्चालक बाबुराम गुरुङले स्वागत मन्तव्य राख्दै प्रशिक्षणको उद्देश्य, औचित्य र उपयोगिताबारे प्रकाश पारेका थिए । यसका साथै प्रशिक्षण संचालनमा सुरु देखि अन्तसम्म भोगेका अनुभव पनि बांडे । उनले २१ हप्ते भाषा प्रशिक्षणबाट सहभागीहरुले ठूलो लाभ हांसिल गरेको बताउंदै प्रशिक्षण संचालनमा प्रत्यक्ष अप्रत्यक्ष सहयोग गर्ने सबैप्रति आभार व्यक्त गरे ।
सो अवसरमा प्रमुख अतिथि काउन्सिलर बटलाई तमु समाज युकेका पूर्व अध्यक्ष शिवशरण गुरुङ र कार्यक्रमका सभापति तथा उपाध्यक्ष शिवकुमार गुरुङले खादा लगाई सम्मान गरेका थिए ।
प्रमुख अतिथिले सबै सहभागी प्रशिक्षार्थीलाई प्रशिक्षण पुरा गरेको प्रमाणपत्र प्रदान गरे भने बिसु गिरीलाई प्रशिक्षकको रुपमा गरेको महत्वपूर्ण योगदानको कदर स्वरुप समाजका तर्फबाट खादा लगाई प्रशंसा पत्र दिए ।
प्रशिक्षणमा सबैभन्दा जेष्ठ प्रशिक्षार्थीहरु श्रीमति झुमा मगर, श्रीमती मनकली गुरुङ, श्रीमति मन कुमारी गुरुङ र श्रीमति निर्मला गुरुङले सबैको प्रतिनिधित्व गर्दै प्रशिक्षक गिरीलाई मायाको चिनो र खादा लगाएर धन्यवाद दिएका थिए ।
कार्यक्रममा प्रशिक्षक गिरीले स्वयंसेवकका रुपमा प्रशिक्षण दिने अवसर प्राप्त गरेकामा खुशी व्यक्त गर्दै धेरै राम्रा अनुभव बटुलेको बताए । उनले आगामी दिनमा पनि समय अनुकुलता अनुसार सेवा गर्न सदा तयार रहेको प्रतिवद्धता व्यक्त गरे ।
प्रमुख अतिथि बटले समाजले गरेको उदाहरणीय कार्यको प्रशंसा गर्दै सबैलाई बधाई तथा धन्यवाद दिए । बेलायतमा सामाजिक अन्तरघुलनसंगै दैनिक जीवन पद्धति सहज बनाउन अत्यन्तै महत्वपूर्ण रहेको अंग्रेजी भाषा प्रशिक्षणबाट जेष्ठ नगारिकहरुले ठूलो लाभ लिएको बताउंदै बटले आगामी दिनमा पनि समाजले गर्ने महत्वपूर्ण कार्यक्रममा आफ्नो सहभागिता र सहयोग रहने प्रतिवद्धता व्यक्त गरे ।
कार्यक्रमको अन्तमा सभापति तथा उपाध्यक्ष शिवकुमार गुरुङले धन्यबाद दिए । उपाध्यक्ष गुरुङले प्रशिक्षणको शुभारम्भ र समापन दुबै कार्यक्रममा आफू सहभागी बन्ने अवसर प्राप्त गरेकोमा खुशी ब्यक्त गर्दै २१ हप्ता भाषा कक्षामा सहभागी भई अंग्रेजी भाषा सिकेकामा सबैलाई बधाइ दिए । यसैगरी उनले भाषा प्रशिक्षणबाहेक अतिरिक्त रोड सेफ्टी, स्वास्थ्य खाना र स्वास्थ्य जीवनशैली कसरी जिउन सकिन्छ भन्ने विषयमा पनि सहभागीले ज्ञान हासिल गरेको बताउंदै रोड सेफ्टी कक्षा सञ्चालन गर्ने सल्लाहकार लेप्टेनेन्ट रि. थमप्रसाद गरुङ र स्वास्थ्य खानपिन/जीवन शैली कसरी जिउने भन्ने विषयमा जानकारी दिने सुश्री मोनिका गरुङलाई पनि धन्यवाद दिएका थिए ।
धन्यवाद ज्ञापनकै क्रममा उपाध्यक्ष गुरुङले प्रशिक्षक गिरी, प्रशिक्षणका संयोजक तथा कम्युनिटी सेन्टरका प्रवन्धक बाबुराम गुरुङ र सह प्रवन्धकद्वय यामबहादुर गुरुङ र इमान घलेलाई पनि धेरै धन्यवाद दिए । यसैगरी प्रशिक्षण सञ्चालनमा सम्पूर्ण आर्थिक ब्यवस्थापनको महत्वपूर्ण पाटो संयोजन गर्न विशेष भूमिका निर्वाह गर्ने तमु समाज युकेका संस्थापक अध्यक्ष तथा सल्लाहकार चित्रबहादुर गरुङ र समाजका आर्थिक सल्लाहकार लेखनाथ घिमिरेप्रति पनि आभार ब्यक्त गरेका थिए ।
कार्यक्रमका सभापति तथा उपाध्यक्ष शिवकुमार गुरुङले प्रशिक्षणका लागि सम्पूर्ण आर्थिक सहयोग उपलब्ध तथा प्रायोजन गरिदिने नेशनल लट्री फन्ड तथा बिग लट्री फन्डलाई विशेष आभार व्यक्त गरे । यसै गरि प्रशिक्षण अवधिभर प्रत्येक हप्ता शुक्रबार र समापन कार्यक्रममा सस्तोमा खाना उपलब्ध गराइदिने रारा केटर्सलाई पनि धन्यवाद दिए ।
