एनआरएनए यूके उपमहासचिव अधिकारीले आइसीसी सचिवमा उम्मेदवारी दिने

लन्डन । एनआरएनए यूके उपमहासचिव बिनय अधिकारीले गैरआवासीय नेपाली संघ अन्तर्राष्ट्रिय समन्वय परिषद्को सचिव पदमा उम्मेदवारी दिने भएका छन् । अधिकारी आगामी अक्टोबरमा काठमाण्डौं हुने नवौं सम्मेलनमा सचिव पदमा उम्मेदवार हुन लागेका हुन् ।

बेलायतमा व्यवसाय र गैरआवासीय नेपाली संघजस्ता सामाजिक संस्थामा एकै पटक सकृय रहदै आएका अधिकारी एनआरएन यूके कार्यसमितिमा सकृय भूमिका निर्वाह गर्ने मध्येका एक हुन् ।

एनआरएनमा सक्षम नेतृत्व, साझा प्रतिनिधित्व, पारदर्शीता, जवाफदेहिता, समावेशिता, सामूहिक एकता, सबै नेपाली बीच एकता हुनुपर्छ भन्ने विचार अधिकारी राख्छन् । उनी गैर आवासीय नेपाली संघ एनआरएनए यूकेको २०१७–२०१९ कार्यकालको लागि उपमहासचिवमा निर्वाचित भएका थिए ।

नेपाल र नेपालीप्रति भाइचारा सम्बन्ध स्थापित गर्ने, बेलायतमा रहेका भूपू गोर्खाहरुको अधिकार स्थापित गराउने, एनआरएनमा युवाको सहभागिता बढाउने, पारदर्शी, जवाफदेही, उत्तरदायी एनआरएन निर्माण गर्नेजस्ता विभिन्न कार्यहरुमा प्रतिबद्धता सहित निरन्तर लागिरहेको अधिकारी बताउँछन् । गैर आवासीय नेपाली संघ केन्द्रमा रहेर अझ बिशेष भूमिका निर्वाह गर्ने प्रतिवद्दता उनको छ । २०१३ साल साधारण सदस्यपछि एनआरएनएमा लागेका अधिकारी विभिन्न सामाजिक संस्थामा क्रियाशील छन् । चितवन स्थायी घर भएका अधिकारीले चितवन एड ट्रस्टमा समेत महत्वपूर्ण भूमिका निर्वाह गरेका थिए ।

एनआरएनए नर्दन आयरल्याण्ड, स्कटल्याण्ड, वेल्समा गठन गर्ने काममा पनि उनको महत्वपूर्ण भूमिका थियो । एनआरएनए यूकेलाई बेलायतभर पुर्याउने काममा अध्यक्ष योगकुमार फगामीसंगै उनले पनि महत्वपूर्ण भूमिका खेलेका थिए । एनआरएनए यूकेले पहिलो पटक तीन संघीय राज्यपरिषद् गर्दै क्षेत्रीय समिति गठन थियो ।

बेलायती सेनामा भूतपूर्व गोर्खामाथि भएको असमानता हटाउन दुवै मुलुकका सरकारले प्राविधिक टोली बनाएर तयार गर्ने काममा एनआरएनए यूकेले विशेष भूमिका निर्वाह गरेको थियो । गैर आवासीय नेपाली संघ केन्द्रमा अध्यक्ष भवन भट्ट, कुमार पन्त लगायत सबैसंग सौहार्दपूर्ण सम्बन्ध रहेको बताउँछन् । आइसीसी नेताहरुसँग राम्रो सम्बन्ध रहेकै कारण सजिलै निर्वाचित हुने अधिकारी ढुक्क छन् ।