एनआरएन चुनावमा नेकपाको ‘नेतृत्वदायी’ भूमिका हुने

लन्डन । प्रवासी नेपाली एकता मञ्च यूकेले अगुवा नेता तथा कार्यकर्ताहरुसंग भेटघाट गरेको छ । पार्टी एकता भएपछि पहिलोपटक प्रवासी नेपाली मञ्च यूके र जनप्रगतिशील नेपाली मञ्च यूकेले आइतबार मेरिडियन स्पोर्टस क्लब चाल्टनमा नेता-कार्यकर्ता भेटघाट गरेको हो ।

बिहान १२ देखि ८ बजे सांझ सम्म चलेको भेटघाटमा पूर्व प्रवासी नेपाली मञ्च यूकेका अध्यक्ष राजेन्द्र पुडासैनी, पूर्व जनप्रगतिशील मञ्च यूकेका अध्यक्ष सुरेश गौतमले अगुवा नेता तथा कार्यकर्तालाई संयुक्त रुपमा स्वागत गरेका थिए ।

परिचयात्मक कार्यक्रम गरि औपचारिकतामा परिणत गरिएको भेटघाटमा पूर्व एमाले निकट प्रवासी नेपाली मञ्च यूकेका अध्यक्ष पुडासैनीले दुवै पार्टीका नेता कार्यकर्ता अन्तरघुलनले बेलायती नेपाली समाजमा दीर्घकालिन महत्व राख्ने बताए । उनले मञ्च एकीकरणमा केन्द्रका कारण ढिलाई भएपनि नेता कार्यकर्ताहरुको जमघटले सबैमा उत्साह थप्ने विश्वास व्यक्त गरे ।

पुडासैनीले समाज परिवर्तनका लागि आसन्न गैरआवासीय नेपाली संघ यूकेको निर्वाचनमा पार्टी ‘स्टेक होल्डर’ भएकाले नेतृत्वदायी भूमिका निर्वाह गर्न सबैसंग निरन्तर छलफलमा रहेको जानकारी दिए । उनले उपस्थित नेता तथा कार्यकर्तालाई एनआरएनए यूकेको सदस्यता लिन र आफ्ना नजिकका साथीभाईलाई दिलाउन सबैमा आग्रह गरे । दुई पार्टी एक भई नेकपा निर्माण भइसकेको अवस्थामा बेलायती नेपाली समाजमा प्रवासी नेपाली एकता मञ्च यूकेले नेतृत्वदायी भूमिका निर्वाह गर्ने सबैको सहयोग आवश्यक रहेकोमा पनि उनले जोड दिए ।

पूर्व माओवादी निकट जनप्रगतिशील नेपाली मञ्च यूकेका अध्यक्ष सुरेश गौतमले यस्ता भेटघाटले 
मञ्चलाई बलियो बनाउने र नेपाली समाजमा नेतृत्वदायी भूमिका निर्वाह गर्न सक्षम बन्ने आशा व्यक्त गरे । उनले एनआरएनए यूके निर्वाचनमा उम्मेदवारी दिने सबै उम्मेदवारसंग पार्टीले छलफल गरि आधिकारिक उम्मेदवार सार्वजनिक गर्ने जानकारी दिए ।

उक्त भेटघाटमा नेपालबाट बेलायत भ्रमणमा रहेका नेपाल प्रेस काउन्सिलका सदस्य तथा पत्रकार खिलाबहादुर 
भण्डारी समेतको उपस्थिति थियो । पूर्व ओएनएफका महासचिव विजय लिङ्देनले सञ्चालन गरेको कार्यक्रममा दुवै पार्टीका नेता तथा कार्यकर्तावीच परिचय समेत भएको थियो । लामो समयदेखि पार्टी काम गरेका सदस्यहरुबीचको भेटघाटलाई घनीभूत पार्दै अघि बढ्नु पर्नेमा अगुवाहरु सहमत थिए ।