हाङपाङ समाज युकेको भेटघाट सम्पन्न

लन्डन । ताप्लेजुङ जिल्लाको हाङपाङबाट युके आई विभिन्न स्थानमा बसोबास गरिरहेका गाउँलेहरुको द्वैवार्षिक भेटघाट सम्पन्न भएको छ । शनिबार फेल्थाम कम्युनिटी हलमा आयोजना गरिएको सो भेटघाटको अध्यक्षता हाङपाङ समाज युकेका अध्यक्ष यमबहादुरआङबुहाङले गरेका थिए ।

कार्यक्रममा वरिष्ठ उपाध्यक्ष तथा भेला संयोजक टेकमान खपाङ्गीमगरले हेल्थ एण्ड सेफ्टीका बारेमा जानकारी गराएका थिए भने कार्यक्रम महासचिव सरला सुब्बाले सञ्चालन गरेकी थिइन् । कार्यक्रममा समाजका सदस्यहरु काजीमान याक्सोले नेपाल सरकारबाट जनसेवा श्री (पञ्चम) प्राप्त गरेको, नरेश खपाङ्गीमगर नेपाल पत्रकार महासंघ युकेको अध्यक्ष पदमा दोस्रो कार्यकालका लागि चयन भएकोमा सम्मान गरिएको थियो ।

त्यस्तै, स्नातक तथा स्नातकोत्तर गर्ने समाजका सदस्यका छोराछोरीहरुमा महासचिव सरला सुब्बा र लक्ष्मीबहादुर आङबुहाङका छोराहरु निसाङ आङबुहाङ (पूर्वाञ्चल विश्वविद्यालयबाट जनस्वास्थ्य विषयमा स्नातकोत्तर), सन्तोष आङबुहाङ (किंग्स कलेज काठमाडौंबाट व्यापार प्रशासन विषयमा स्नातकोत्तर) र अशेष आङबुहाङ (मिडलसेक्स विश्वविद्यालय लण्डनबाट लेखा तथा वित्त शास्त्रमा स्नातक) गरेकोमा प्रशंसापत्र प्रदान गरिएको थियो ।

यस्तै, जितहाङ याक्सो, गजेन्द्र याक्सो, दीपक याक्सो, मञ्जना याक्सो पाहिम र राममाया याक्सोलाई समाजको नयाँ सदस्यता प्रदान गरिएको थियो । यसैगरी, हालैमात्र पुत्र लाभ गरेकामा समाजका सदस्य विराट आङबुहाङलाई वधाई ज्ञापन गरिएको थियो ।
कार्यक्रममा खेल सचिव चन्द्रकुबेर आङबुहाङले महिलाहरुका लागि म्यूजिकल चेयर र राफल ड्र याक्थुङ आङबुहाङले सञ्चालन गरेका थिए ।

कार्यक्रममा कोषाध्यक्ष दीपक याक्सोले आर्थिक हिसाबकिताबका साथमा हाङपाङको आकर्षक एरियल फोटो र भिडियो प्रस्तुत गरे । अध्यक्ष यमबहादुर आङबुहाङले समाजले हालसम्म गरेको कार्यको जानकारी दिँदै कार्यक्रम सफल बनाउन मद्दत गर्ने सबैलाई धन्यवाद दिए । कार्यक्रममा कोषाध्यक्ष दीपक याक्सोले उपस्थित सबैको परिचय गराएका थिए भने अन्त्यमा च्याब्रुङ नाचका साथ कार्यक्रम समापन गरिएको थियो ।