पार्टी परिवर्तन गरेपछि धन गुरुङले हारे काउन्सिलर पद

लन्डन । बेलायतमा सन् २००७ मा काउन्सिलर पद जितेपछि धन गुरुङ एकाएक चर्चाको शिखरमा आए । नेपाली मुलको पहिलो काउन्सिलर । फोकस्टन टाउन काउन्सिलरको हैसियतमा उनले अभिनेत्री जोआना लुम्ली र पिटर क्यारोलका साथ गोर्खा आन्दोलनलाई नेतृत्व पनि गरे भने नेपालका शीर्षस्थ नेताहरुसंग समेत उनको राम्रो ‘कनेक्सन’ बन्यो । उनी त्यतिबेला लिबरल डेमोक्रयाट्सबाट चुनाव लडेका थिए । तर, लिब्डेमको घट्दो लोकप्रियतासंगै गुरुङको राजनीति पनि पराजयन्मुख भयो । सन् २०११ मा काउन्सिलर पदको कार्यकाल सकिएपछि फेरि लिब्डेमबाट लडे तर दुई पटक हार बेहोर्नु परयो ।

उनको क्षेत्रमा लिब्डेमको अस्तित्व लगभग विलिन 
हुंदै गएपछि सन् २०१६ मा सत्तारुढ कन्जरभेटिभको सदस्य बने गुरुङ । दरिलो पार्टीको साथ भए गोर्खा मुद्दा अगाडि बढाउन पनि सहज हुन्छ भन्ने उनको विश्वास थियो । यसपटक फोक्सटन एण्ड हाइथ 
डिष्ट्रिक्ट काउन्सिलमा कञ्जरभेटिभ पार्टीबाट उम्मेदवार रहेका उनले फेरि हार खानु परेको छ ।

‘ब्रेक्जिटका कारण कन्जरभेटिभले धेरै सिट हारेको छ’, गुरुङले भने, ‘केन्द्रले राम्रो काम गरेन भने काउन्सिलमा समेत असर पर्दो रहेछ ।’ करिब १७ सय मत खसेकामा गुरुङले २५९ मत ल्याएका थिए । त्यहां ३८६ मत ल्याएर लेबरले जितेको छ ।

‘अधिकांश इष्टर्न युरोपियन बस्ने उक्त ठाउं मेरो लागि नयां पनि थियो तर म हारले कत्ति विचलित छैन्’, उनी भन्छन्, ‘जुनै पार्टीले जितेपनि काउन्सिलमा नेपालीको आवाज जानुपर्छ भन्ने मेरो मान्यता रहिआएको छ ।’

उनले जित्नेलाई वधाइ र सहयोगीलाई धन्यवाद दिएका छन् । ‘काउन्सिलरको दायित्व सामाजिक काम नै हो’, गुरुङले भने, ‘मैले नेपालीलाई स्थानीय राजनीतिमा आउन बाटो खोलिदिएं त्यसैमा गर्व छ ।’