दिया ‘दयारानी’बाट आशावादी

लण्डन । बेलायतवासी नायिका दिया पुनको अभिनय रहेको पछिल्लो चलचित्र हो ‘दयारानी’ । हालै चलचित्र ‘क्याप्टेन’ प्रिमियरमा भेटिएकी दियाले आफू उक्त चलचित्रबाट निकै आशावादी रहेको बताएकी छन् ।

‘वीर विक्रम’ बाट नेपाली रजतपटमा उदाएकी दियाले अभिनय गरेको विगतका केही चलचित्र अपेक्षित व्यवसायिक सफल नभएपछि दयारानीबाट आशावादी हुनु स्वभाविक हो । उनी यस चलचित्रमा दयाहाङ राईको ‘अपोजिट’ मा दयारानीको भूमिकामा देखिंदैछिन् । ‘दयारानी’ महिलाले पुरुषबाट भोग्नु परेको समस्या, घरेलु हिंसा विरुद्ध नारी प्रधान विषय वस्तुमा ‘सोशल ड्रा’ रहेको उनले बताइन् ।

दयारानीलाई रामबाबु गुरुङ, अपिल विष्टले निर्माण गरेका हुन् भने निर्देशन माउत्से गुरुङको छ ।

सरल अभिनय, भूमिकाप्रतिको इमान्दारिताका कारण चलचित्रमा उनको माग बढ्दो छ तर बेलायत बसाइका कारण उनले नेपाली चलचित्रलाई पर्याप्त समय दिन सकेकी छैनन् ।