लण्डन । नेपाली सांस्कृतिक समाज युकेले २२ अप्रिल साँझ लाइभ कन्सर्ट गरेको छ । लिभरपुल आइरिस कम्युनिटी सेन्टरमा कन्सर्ट भएको हो ।
उक्त कार्यक्रममा समाजको आमन्त्रणामा नेपालदेखि आएका ख्यातिप्राप्त कलाकारद्वय हिमाल सागर र आशिष सचिनको बेजोड प्रस्तुति रह्यो । कन्सर्टमा दर्शकहरु धित मरुन्जेल नाचे ।
समाजका संस्थापक अध्यक्ष गोपाल अधिकारीले विशुद्ध नेपाली कला र संस्कृतिलाई बेलायती समाजमा प्रवर्धन गर्ने उद्देश्यका साथ नेपाली नयाँ वर्ष २०७६ का दिन ‘नेपाली सांस्कृतिक समाज युके’ स्थापना गरिएको जनाए ।
उनले समाजले अब देखि स्थानीय स्तरमा नेपाली सिने कलाकारसम्मको उत्पादन गर्ने र समाजले निकट भबिष्यमा नै लिभरपुलमा नेपाली परम्परागत पञ्चे बाजा पनि प्रवर्धन गर्ने जनाए ।
अधिकारीले समाजको बेलायती समाजसँग पनि विशेष सम्बन्ध रहेको बताउँदै समाजको कार्यकारिणी समिति गठन भएको समेत बताए ।
कार्यक्रम संचालिका श्रीमती कृष्णा गुरुङले समाज विदेशमा रहेका नेपाली र तिनका सन्ततिहरुका लागि मार्गदर्शक बन्ने बताइन् ।
अन्तमा उपाध्यक्ष नेत्र खरेलले यथाशीघ्र समाज आफ्नो अभियानतिर अग्रसर हुने प्रतिवद्धता ब्यक्त गर्दै सबै नेपालीहरुलाई एकजुट भई नेपाली कला संस्कृतिको जगेर्ना तथा प्रवर्धन गर्न आव्हान गरे ।
