लन्डन । एनआरएनए यूकेकी उपाध्यक्ष एवं महिला सामाजिक अभियन्ता पुनम गुरुङले एनआरएनए यूकेको अध्यक्षमा उम्मेदवारी दिने घोषणा गरेकी छन् । संघको सोमबार नोटिङहाममा सम्पन्न बैठकले निर्वाचन मिति तोकेसंगै पुनमले उम्मेदवारी दिने घोषणा गरेकी हुन् । एनआरएनए यूकेको अधिवेशन सेप्टेम्बर १४-१५ तारिख तय भएको छ ।
‘एनआरएनए यूकेमा उपाध्यक्ष भएपछि मैले धेरै कुरा सिक्न र बुझ्न पाएं । आफ्नो अनुभवसंगै स्रोत साधन तथा अग्रज अभियन्ताहरुको सुझाव सल्लाहमा म अध्यक्ष लड्ने निष्कर्षमा पुगेकी हुं’- उनले भनिन् ।
उनले आफ्ना एजेण्डासहित थप कार्यक्रम छिट्टै सार्वजनिक गर्ने बताएकी छन् । ‘मेरो उम्मेदवारी महिला वा जनजाती भएकै आधारमा नभइ संघलाई हाँक्न सक्ने आत्मविश्वासले आएको हो’-उनी भन्छिन् ।
‘अग्रजहरुको सल्लाहमा सबैलाई समेट्ने गरी अगाडि बढ्ने मेरो सोच छ’, उनले भनिन् ‘महिला हक हित, वेलफेयर, लगानी, नागरिकतासहित संघले अगाडि बढाइरहेका हरेक मुद्दामा मेरो क्रियासिलता रहने छ ।’
डेढ दशक बढि समयदेखि बेलायत बस्दै आएकी पुनम यहाँ हुने हरेक जसो सामाजिक गतिबिधिमा सक्रिय छन् । उनी विभिन्न सामाजिक संघसंस्था र व्यवसायमा समेत संलग्न छन् ।
