फोटो एकेन्द्र गुरुङ
लण्डन । डार्टफोर्ड, केन्टमा बसोबास गर्ने नेपालीहरुले नेपाली नयाँवर्ष २०७६ विभिन्न कार्यक्रमका साथ मनाएका छन् ।
गत शनिबार टेम्पल हिलस्थित कम्युनिटी हलमा भएको सो कार्यक्रममा उनीहरुले एक आपसमा नेपाली नयाँ वर्षको शुभकामना साटासाट गरे ।
ब्रिटिश गोरखा नेपाली कम्युनिटी डार्टफोर्डका अध्यक्ष मोहन गुरुङको अध्यक्षता र सचिव एक गुरुङको सञ्चालनमा भएको सो कार्यक्रमको प्रमुख अतिथि राम गुरुङ थिए ।
कार्यक्रममा समाजका संस्थापक अध्यक्ष कुल घले, नेपाल पत्रकार महासंघ युकेका अध्यक्ष नरेश खपाङ्गीमगर, समाजका प्रमुख सल्लाहकार गणेश राना अतिथिका रुपमा रहेका थिए ।
सो अवसरमा प्रमुख अतिथि गुरुङले महिला समितिबाट तयार पारिएको नयाँवर्षको केक पनि काटेका थिए । उनले नयाँ वर्षको अवसरमा सबैलाई शुभकामना दिँदै समाजलाई आफ्नो तर्फबाट १०१ पाउण्ड सहयोग पनि घोषणा गरे ।
कार्यक्रममा अध्यक्ष मोहन गुरुङले नयाँ वर्षले समाजका सबै सदस्यहरुमा सुस्वास्थ्य र उन्नति ल्याओस् भन्दै समाजका आगामी कार्यक्रमहरु समर बार्बीक्यु, तीज दशैँतिहार कार्यक्रममा पनि सक्रिय उपस्थितिका लागि अनुरोध गरे ।
कार्यक्रममा युथ टीमका तर्फबाट दिब्या गुरुङ र सन्देश रानाले बिंगो खेलाएका थिए ।
कार्यक्रममा उपाध्यक्ष हेमा राना गुरुङले स्वागत मन्तब्य दिएकी थिइन् भने कोषाध्यक्ष हेम काला थापाले प्रवेश शुल्क, योगेन लिम्बुले पेयपदार्थ, कृष्ण थापा र दीपक गुरुङले डीजेको जिम्मा सम्हालेका थिए ।
कार्यक्रमको अन्त्यमा मनोरञ्जनात्मक कार्यक्रम प्रस्तुत गरिएको थियो ।
