लण्डन । नववर्ष २०७६ को पूर्व सन्ध्यामा लण्डनमा एक मुक्तक वाचन तथा मुक्तक लेखन कार्यशाला गोष्ठी सम्पन्न भएको छ । नेपाल मुक्तक प्रतिष्ठान बेलायतले गत शनिवार कार्यक्रम गरेको हो ।
उक्त कार्यक्रमको सभापतित्व प्रतिष्ठानका अध्यक्ष दुर्गाप्रसाद पोख्रेल र संचालन गीतकार नृपेश उप्रेतीले गरेका थिए । संस्थाकी उपाध्यक्ष प्रतिमा केसीले सबै उपस्थित मुक्तककारहरूको स्वागत गरेकी थिइन् । कार्यक्रम प्रस्तोता उप्रेतीले केन्द्रीय अध्यक्ष एवं महासचिवबाट प्राप्त शुभकामना मन्तव्य पढेर सुनाएका थिए ।
सो अवसरमा उपस्थित मुक्तककारहरूले आफ्ना चोटिला पोटिला मुक्तक सुनाए । मुक्तक वाचन गर्ने मुक्तककारहरूमा सुश्री समृद्धि पोख्रेल, राज श्रेष्ठ, प्रतिमा केसी, बिनोद अधिकारी, भरत लोहरुंग, सेमन्त राई, रबिन जोशी, कुमार केसी, नृपेश उप्रेती, रुपक श्रेष्ठ एवं दुर्गाप्रसाद पोख्रेल थिए ।
वाचित मुक्तकहरू माथि शैलीगत विवेचना र मुक्तक लेखनको वर्तमान स्वरुपबारे प्रमुख अतिथि डा. रुपक श्रेष्ठले चर्चा गरेका थिए । मुक्तकको ऐतिहासिक एवं पौराणिक सन्दर्भका विषयमा दुर्गाप्रसाद पोख्रेलले प्रकाश पारे । समारोहमा संस्थाका आजीवन सदस्यहरूलाई संस्थाको लोगो अंकित व्याज वितरण समेत गरिएको थियो ।
नेपाली नयाँ वर्षको शुभ आगमनको स्वागतार्थ लण्डनमा आयोजित मुक्तककेन्द्रीत उक्त समारोह अत्यन्त सार्थक रहेको सहभागीहरूले बताएका छन् ।
