इयुबाट अलग्गिने समय लम्ब्याउने पक्षमा बेलायती सांसदहरू

Photo: वेभबाट

लन्डन । बेलायतलाई अलग गर्ने प्रक्रिया लम्ब्याउने पक्षमा बेलायती सांसदहरुले मत जाहेर गरेका छन् ।

बेलायतको तल्लो सदन हाउस अफ कमन्समा बिहीबार भएको मतदानमा प्रधानमन्त्री थेरेसा मेलाई ब्रेक्जिट समयसीमा लम्ब्याउन इयूसित अनुरोध गर्ने पक्षमा सांसदहरुले मत दिएका हुन् । सो प्रस्तावको पक्षमा ४१३ र विपक्षमा २०२ मत परेको थियो ।

सो मत परिणामपछि पूर्व घोषित समयसीमा २९ मार्चमा बेलायत इयूबाट नबाहिरिने पक्का भएको छ ।

मत परिणामपछि प्रधानमन्त्री मेले यदि सांसदहरुले आफूले ल्याउने अर्को प्रस्तावमा सांसदहरुले बहुमत दिएमा तीन महिना ब्रेक्जिट लम्ब्याउने र सांसदहरुले बहुमत नदिएमा इयूसित थप समयका लागि माग गर्ने बताएकी छिन् । यसरी समय थप्न परेमा इयूमा आवद्ध २७ वटै देश सहमत हुनपर्नेछ ।

संसदमा आज भएको मतदानमा ब्रेक्जिट पक्षधर सांसदहरुले ब्रेक्जिटलाई लम्ब्याउन नहुने पक्षमा मतदान गरेका थिए । जसमा सात मन्त्रीहरुसमेत छन् । तर, विपक्षी लेबोर पार्टी लगायतका सांसदले भने समय सार्ने पक्षमा मत दिएका थिए ।

आफूले ल्याएको ब्रेक्जिट सम्बन्धी प्रस्ताव दुईपटक पराजित भएपछि प्रधानमन्त्री मेले समयसीमा सार्ने प्रस्ताव ल्याएकी हुन् । प्रधानमन्त्री कार्यालयका अनुसार प्रधानमन्त्री मेले आगामी बुधबारभित्र ब्रेक्जिटसम्बन्धी अर्को प्रस्ताव संसदमा ल्याउने तयारी गर्दैछिन् । यसबाहेक प्रधानमन्त्री मेले ‘नो डिल’ सम्बन्धी प्रस्तावको पनि तयारी गरेको बुझिएको छ ।

यसअघि ब्रेक्जिटका बारेमा अर्को जनमत गर्ने प्रस्ताव भने अस्वीकृत भएको छ । सो प्रस्तावका पक्षमा ८५ मत परेको थियो भने विपक्षमा ३३४ मत परेको थियो ।

प्रतिक्रिया

सम्बन्धित सामाग्री