व्यवसायी खड्काले मानसिक बिरामीको सहयोगार्थ दिए साढे तीन लाख रुपैयां


लन्डन । बेलायतका एक जना व्यवसायी सुनिल खड्का यस पटकको नेपाल होलिडे च्यारिटी कर्ममा बिताएर फर्किएका छन् । ‘नेपाल पर्यटन वर्ष २०२०’ को प्रवर्धनसहित एकजना बेलायतीलाई नेपाल घुमाउन संगै लगेका खड्काले नेपालमा मानसिक रोगीहरुका लागि कार्यरत संस्था मानवसेवा आश्रमलाई साढे तीन लाख रुपैयां प्रदान गरे । खड्काले गत १६ फेब्रुअरीमा मानव सेवा आश्रमका संस्थापक अध्यक्ष रामजी अधिकारीलाई साढे तीन लाख रुपैयांको एक चेक प्रदान गरेका थिए ।

वकिंग नजिक वेष्ट बाइफ्लीटको ‘न्यू हवेली रेष्टुरेन्ट’ का सञ्चालक खड्काले सडकमा बेवारिसे भेटिएका मानसिक रोगीलाई रेखदेख गर्दै आएको संस्थालाई सहयोग गर्न पाउन पाउंदा आफू हर्षित भएको बताए । ‘सानो सहयोगले कसैको मुहारमा खुशी छाउंदा मलाई निकै आनन्द लाग्छ’, खड्काले भने, ‘च्यारिटीसंगै म अहिले नेपालको पर्यटन प्रवर्धनमा पनि लागिरहेको छु ।’

नेपाल जांदा प्रत्येक पटक चन्दा दिएरै फर्कन्छन् सुनिल । गत वर्ष उनले चितवनको आइ बैंकलाई एक लाख ११ हजार एकसय ११ रुपैयां प्रदान गरेका थिए ।

उनले भर्खरमात्र अल्डरसटस्थित शिव कल्चरल सेन्टरलाई शिव मन्दिर स्थापनार्थ एकहजार एक पाउण्ड दिएका थिए ।


१८ वर्षदेखि बेलायत बस्दै आएका खड्का समाजसेवामा पनि उत्तिकै सक्रिय रहँदै आएका छन् । उनले सन् २०१७ नोभेम्बर दोश्रो साता परफर्ड वेष्ट बाइ फ्लीटमा अवस्थित परफर्ड चर्च अफ इंग्ल्याण्ड प्राइमरी स्कुललाई एकहजार १७ पाउण्ड आर्थिक सहयोग गरेका थिए ।

हालैमात्र ‘रिलोकेट’ गरि सञ्चालनमा ल्याइएको खड्काको ‘न्यू हवेली रेष्टुरेन्ट’ 
सांसद जोनाथन लर्डले केही महिनाअघि विशेष समारोहबीच उद्घाटन गरेका थिए । चितवन एड ट्रष्ट (क्याट) यूकेका पूर्व उपाध्यक्ष एवं सल्लाहकार खड्का एनआरएन अभियन्ता पनि हुन् ।

प्रतिक्रिया

सम्बन्धित सामाग्री