लन्डन । बेलायतको अल्डरसटमा शिव मन्दिर निर्माणार्थ भवन किन्न तीन लाख पाउण्ड जुटेको छ । शिव कल्चरल एण्ड कम्युनिटी सेन्टरले चन्दामार्फत उक्त रकम जुटाउन सफल भएपछि सम्भवतः यही शुक्रबारसम्म मन्दिर तथा सामुदायिक भवनको चाबी हात पर्नेछ । एकैचोटी ‘मोर्गेज फ्रि’ मा सामुदायिक भवन किन्ने सम्भवतः नेपाली समुदायमा सेन्टर नै पहिलो हो ।
अल्डरसटको क्वीन्स रोडमा अवस्थित एक सामुदायिक भवन खरिद गरि त्यसलाई मन्दिरको स्वरुप दिइनेछ । उक्त भवन मन्दिरमात्र नभइ नेपाली समुदायले विभिन्न धार्मिक, सांस्कृतिक तथा सामाजिक प्रयोजनका लागि प्रयोग समेत गर्न सक्नेछ ।
सेन्टरका महासचिव विक्रम भट्टराईका अनुसार, ३ सय ५९ जना मनकारी दाताहरुबाट उक्त रकम संकलन गरिएको हो । ‘निस्वार्थ रुपमा सहयोगी मन एकजुट भएपछि ३ महिना पहिलेसम्म असम्भव जस्तै लागेको हाम्रो मन्दिर सपना आजबाट वास्तविकतामा परिणत हुंदैछ’- भट्टराईले खुशी व्यक्त गर्दै भनेका छन् ।
मन्दिर भवन किन्न चुक्ता गर्नुपर्ने ३ लाख पाउण्ड वकिलको कार्यालयमार्फत चुक्ता गरिसकिएको सेन्टरले जनाएको छ । सेन्टरका अध्यक्ष रोहित गुरुङले यस ऐतिहासिक उपलब्धिका निम्ति बेलायतको हरेक कुना, तह तप्का र परिवारबाट भएको योगदानका लागि कृतज्ञता व्यक्त गरेका छन् ।
सेन्टरले आर्थिक संकलनका लागि गत जनवरी ४ देखि ६ सम्म नेपालका वाचन शिरोमणी दिनवन्धु पोख्रेलवाट श्रीमद् भागवत र वौद्ध धर्म सम्बन्धि प्रवचन पनि गरेको थियो ।
