लण्डन । लण्डनको वेलिङमा नेप्लिज युथ नेटवर्क युकेले विविध सांस्कृतिक कार्यक्रम सहित अंग्रेज़ी नयाँ वर्ष भव्यताकासाथ स्वागत गरेको छ ।
सोसाइटी अफ नेप्लिज प्रोफेसनल्स युकेको सहयोगमा आइतबार आयोजित कार्यक्रममा गीत, नृत्य, हाजिरीजवाफ, अङ्ग्रेजीलाई नेपालीमा उल्था गर्ने तथा बिङ्गो लगायतका गतिविधिहरु गरिएका थिए ।
नेपाली मूलका बेलायती नेपाली सन्ततिहरुलाई आफ्नो पुर्ख्यौली थलोसंग जोडने, युकेमा रहेका नेपाली युवा युवतीहरूबीच चिनजान गराउने तथा अभिभावक र छोरा छोरीबिचको दूरी कम गराउँदै स्थानीय वासिन्दाहरुसंग एकीकृत गर्ने उद्देश्यले सन् २०१५ मा नेप्लिज युथ नेटवर्क स्थापना गरिएको थियो ।
कार्यक्रममा बोल्दै सोसाइटी अफ नेप्लिज प्रोफेसनल्स युकेका अध्यक्ष शेखर वाग्लेले विदेशी भूमिमा हुर्किरहेका नेपाली पुस्तालाई नेपाली भाषा र नेपाली संस्कृतिसंग परिचित गराउनु अत्यन्तै महत्वपूर्ण हुने बताए, उनले यसकालागि अभिभावक स्वयंले आफ्ना बालबालिकालाई प्रोत्साहित गराउनु पर्ने सुझाव पनि दिए । उनले समाजका सदस्य लगायत सबैलाई नयाँ वर्षको अवसरमा शुभकामना पनि दिएका थिए ।
हालै बेलायतको बेडफोर्डबाट डार्टफोर्ड क्षेत्रमा बसाईं सरेका बिदुर घिमिरेले यस्ता कार्यक्रमको माध्यमबाट आफ्ना छोराछोरीले साथी बनाउन सकेको भन्दै कार्यक्रम आयोजकलाई धन्यवाद दिएका थिए ।
भेलाले आगामी दुई वर्षकालागि सिमरन घिमिरेको अध्यक्षतामा १५ सदस्यीय कार्यसमिति पनि गठन गरेको छ । समितिका सदस्यहरुमा श्रीकृत वाग्ले, निकिता खरेल, अपेक्षा न्यौपाने, सुवास पौडेल, मनस्वी भट्टराई, दीप्ता थापा, यशस्वी भट्टराई, प्रान्जल ओझा, सेजल अधिकारी, सम्राट कोइराला, नियती खरेल, बिराट कोइराला र श्रीना वाग्ले छन् ।
कार्यसमिति सदस्यहरुको आगामी बैठकमा कार्य विभाजन गरी भावी कार्यक्रमको ‘क्यालेन्डर’ पनि घोषणा गर्ने घिमिरेले बताइन् ।
कार्यक्रमको सन्चालन श्रीकृत वाग्ले तथा सम्राट कोइरालाले गरेका थिए । कार्यक्रमको आयोजना गर्न सोसाइटी अफ नेप्लिज प्रोफेसनल्स युकेका कार्यकारी सदस्य संगम भण्डारी लगायत अन्य पदाधिकारीले सघाएका थिए । कार्यक्रममा झण्डै १२० जना अभिभावक तथा किशोरकिशोरीको सहभागिता थियो ।
