डायमन्ड बुद्धिस्ट सेन्टर यूकेमा ग्रहशान्ति पूजा तथा प्रवचन

लण्डन । डायमन्ड बुद्धिस्ट सेन्टर यूकेको आयोजनामा लण्डनस्थित प्लमस्टिड वर्किङ म्यान्स क्लबमा यसवर्षको ग्रहशान्ति पूजा तथा प्रवचन सम्पन्न भएको छ । शुरुमा श्रद्धालुहरुले लामबद्ध भएर पूजाका लागि गुरुहरूलाई धार्मिक संस्कार अनुसार बौद्ध प्रार्थनासहित स्वागत गरेका थिए ।

आइतबार भएको कार्यक्रम सेन्टरले गर्ने वर्षभरिको कार्यक्रम मध्येको एउटा महत्वपूर्ण रहेको संस्थाका महासचिव योगेश गुरुङले बताए । उनले कार्यक्रम सञ्चालनका क्रममा कार्यक्रम रुपरेखाबारे बताए ।

नेपालबाट आएका सम्मानित गुरुहरु खिम्पो सन्तोष गुरुङ, हुङ्त्राम सेचुङ लोपोन छिरिङ वाङदु गुरुङ, लामा खुसीमान गुरुङ र स्थानीय लामा धरम गुरुङद्वारा पूजा सम्पन्न गरिएको थियो । पूजा सकिनासाथ खिम्पो सन्तोष गुरुङले बौद्ध धर्मबारे श्रद्धालुहरूलाई संक्षेपमा महत्वपूर्ण उपदेशद्वारा सम्बोधन गरे । श्रद्धालुहरूले कार्यक्रममा गुरुहरूबाट वाङ (अभिषेक) ग्रहण गरेका थिए ।

यस धार्मिक कार्यक्रममा शुरुमा नै द्वीप प्रज्वलन गरिएको थियो । संस्थाका अध्यक्ष सुमलकुमार गुरुङ लगायत सबै संघसंस्थाबाट प्रतिनिधित्व गरेर पूजामा उपस्थित सबैले पूजामा द्वीप प्रज्वलन गरेर प्रार्थना गरे । महासचिवले यसवर्ष दिवंगत भएका सबै परिवारका उपस्थित सदस्यलाई चीर शान्तिका लागि श्रद्धान्जलिस्वरुप द्वीप प्रज्वलन गर्न पालैपालो नाम बोलाएका थिए ।

प्रवचन पश्चात संस्थाका उपाध्यक्ष हितमान गुरुङले सबैलाई स्वागत र धन्यवाद दिँदै संस्थाको गुम्बा निर्माणका लागि सहयोग गर्न आग्रह गरे ।  संस्थाका वरिष्ठ सल्लाहकार राम गुरुङ र सल्लाहकार तथा दक्षिणपूर्व क्षेत्रीय तमुधिं लन्डनका अध्यक्ष श्रीचन्द्र गुरुङले संस्थाको हितका लागि छोटो मन्तव्य प्रकट गरेका थिए ।

संस्थाकी उपाध्यक्ष मिना गुरुङको संयोजनमा आमा समूहद्वारा भोजन र चियापान व्यवस्था गरिएको थियो । कार्यक्रममा संस्थाका आजिवन सदस्यहरूलाई खिम्पो सन्तोष गुरुङको बाहुलीबाट प्रमाणपत्र वितरण गरियो । त्यसपछि गुरुदक्षिणा दिने क्रममा चारैजना गुरुहरूलाई संस्थाका अध्यक्षले प्रशंसापत्र प्रदान गरे ।

कार्यक्रमको अन्ततिर संस्थाका अध्यक्ष गुरुङले उपस्थित सबै सहयोगी श्रद्धालु र गुरुहरूलाई आभार व्यक्त गर्दै धन्यवाद ज्ञापन गरेका थिए ।