लन्डन । प्रदेश ४ का आर्थिक मामिला तथा योजना मन्त्री किरण गुरुङ तमुधिं यूकेको ल्होछारमा सहभागी हुने भएका छन् । तमुधिं यूकेको १८ औं ल्होछारमा प्रमुख आतिथ्य ग्रहण गर्न मन्त्री गुरुङ आफ्नी जीवनसंगिनी कृष्णकुमारी श्रेष्ठका साथ बेलायत आउने निश्चित भएको हो । ३० डिसेम्बर सांझ रेडिङस्थित रिभरमिड लिजर कम्प्लेक्समा ‘फो ल्होछार’ भव्य मनाउने तयारी छ ।
मन्त्री दम्पति २७ तारिख बेलुका कतार एयरवेजबाट लन्डन हिथ्रो विमानस्थल उत्रने कार्यक्रम छ । बेलायत उत्रिएपछि मन्त्री गुरुङ २९ तारिखमा साउथ इष्ट रिजनल तमुधिंले आयोजना गर्ने ल्होछारमा समेत सहभागी हुनेछन् । लन्डनस्थित नेपाली दूतावासले मन्त्री गुरुङको सम्मानमा एक कार्यक्रम गर्ने भएको छ भने एनआरएनए यूके र प्रवासी नेपाली मञ्च बेलायतले पनि बेग्ला बेग्लै कार्यक्रम गर्ने बताइएको छ ।
बेलायतका तमुहरुले धार्मिक परम्परा अनुसार कुकुर वर्गको विदाइ र मृग वर्गको स्वागत गर्दै ‘फो ल्होछार’ मनाउने भएका छन् । तमुधिं यूकेको ल्होछारमा सहभागी हुन लामा धर्म गुरु खेम्पो सन्तोष गुरुङ र लामा खुशीमान गुरुङ बेलायत आइसकेका छन् । राष्ट्रिय कलाकारहरुको समेत कार्यक्रममा सहभागिता हुने तय भएको छ । यसपटक तमुधिं यूकेले ल्होछारमा चर्चित गायक तथा संगीतकार टंक बुढाथोकी, अन्य गायक गायिका अनु गुरुङ र गोविन गुरुङलाई निम्त्याएको छ । बुढाथोकी बुधबार लन्डन आइपुग्ने छन् भने अनु र गोविन २८ तारिख लन्डनमा आइपुग्ने कार्यक्रम छ । उक्त कार्यक्रममा गोर्खाली समाज यूकेको निम्तोमा लन्डन आइसकेकी शिला गुरुङका अलवा बेलायतमै रहेका गायिकाहरु आंचल लामा र रुबी गौलीले पनि प्रस्तुति दिनेछन् ।
यसपटक ल्होछार विशेष हुने तमुधिं यूके अध्यक्ष ज्ञाम गुरुङले जानकारी दिए । ज्ञाम गुरुङले सोही अवसरमा दशौं कार्यसमितिका नवनिर्वाचित अध्यक्ष नन्दजंग गुरुङलाई अध्यक्षको कार्यभार हस्तान्तरण गर्नेछन् । त्यस दिन बिहान १० देखि २ बजेसम्म धार्मिक कार्यक्रम र सांझ ५ देखि राती १ बजेसम्म सांस्कृतिक, अवार्ड वितरण कार्यक्रम एवं डिजे डान्स गरिने तमुधिं यूकेले जनाएको छ । अध्यक्ष गुरुङले तमुधिं यूकेका हालसम्मका ८ वटा अध्यक्षहरुको विचार, अनुभव तथा तमुधिं यूके इतिहास समेटिएको ‘निरन्तर नेतृत्व’ नामक पुस्तक र मुखपत्र ‘फ्रेंसी’ विमोचन समेत हुने जानकारी दिए ।
राजदूत डा. दुर्गाबहादुर सुवेदी पनि सहभागी हुने उक्त ल्होछारमा जिसिएसइ र ए लेभलमा उत्कृष्ट नतिजा ल्याउने विद्यार्थीहरुलाई डा. हर्क अवार्ड प्रदान गरिने छ । साथै एक तोला सुन पहिलो पुरस्कार भएको ‘राफल ड्र’ खेलाइने छ । सहभागिता उल्लेख्य बनाउन तमुधिं यूकेले अल्डरसट, फार्नबोरो, क्याम्बर्ली, लन्डन प्लमस्टिडबाट बस सेवा समेत व्यवस्था गरेको छ ।
