बेलायतका घरवारबिहीनलाई पूर्व काउन्सिलर गुरुङको क्रिसमस भोज

लन्डन । पूर्व काउन्सिलर तथा दि गोर्खा मेमोरियल फण्डका अध्यक्ष धन गुरुङले बेलायतका घरवारबिहीनलाई ‘क्रिसमस भोज’ ख्वाएका छन् । मातृभूमिका लागि समाजसेवामात्र होइन, बेलायतमा पनि च्यारिटी कर्ममा संलग्न रहंदै आएका गुरुङले शनिबार फोकस्टन टाउनका १६ जना घरवारबिहीनलाई नेपाली खाना प्रवन्ध गरिदिएका हुन् ।

गोर्खा मेमोरियल गार्डेन अफ रिमेम्बरेन्समा आयोजित क्रिसमस पार्टीमा घरवारबिहीनले नेपाल र नेपाली मन, खाना एवं गोर्खाको प्रशंसा गरेका थिए । ‘मैले अझ धेरै सहभागिताका लागि प्रयास गरें तर सकिन’- बेलायतमा नेपाली मुलका पहिलो काउन्सिलर गुरुङले भने, ‘सर्वत्र क्रिसमस रमझम भइरहेका बेला ति घरवारविहीनहरुको दयनीय अवस्थाले मेरो मन छोयो र आफ्नो क्षमताले भ्याएको गरें ।’

पछिल्लो पटक बेलायतमा घरवारबिहीनहरुको संख्या बढिरहेको पाइएको छ । अफिस फर नेशनल स्टयाटिसटिक्सले केही दिन अघि मात्र सार्वजनिक गरेको तथ्यांक अनुसार गत वर्ष सन् २०१७ मा कम्तीमा ५९७ घरवारबिहीन नागरिकको सडक वा अस्थायी वसोवास स्थलमा मृत्यु भयो । सरकारले पहिलो पटक सार्वजनिक गरेको उक्त तथ्यांकमा यो मृत्युदर संख्या पांच वर्ष अवधिमा २४ प्रतिशतले बढि हो ।