लन्डन । ट्वीटरमा दूतावासका साना ठूला सबै कुरा पनि अपडेट गरिरहने बेलायतका लागि नेपाली राजदूत डा दुर्गाबहादुर सुवेदीले मङ्गलबार साँझ बेग्लै किसिमको पोष्ट गरे । ’मेरो व्यक्तिगत र दूतावास कर्मचारीहरुको इमेलहरु अपरिचित ह्याकरहरुबाट ह्याक गरियो र नक्कली समाचारका लागि प्रयोग गरियो । भ्रामक कुराकानीले अन्योल सिर्जना गरिरहेको छ ।’
त्यसको १० मिनेटअघि सुवेदीले गरेको ट्वीटमा ‘अपरिचित ह्याकरहरुबाट भएको ह्याकिङ प्रयासका कारण इमेलमा गम्भीर समस्या भोग्नुपरिरहेको’ उल्लेख थियो । यूकेमा पनि साइबर सुरक्षामा खतरा बढिरहेको उनले ट्वीटमा उल्लेख गरेका छन् ।
राजदूतको दुई ट्वीटबाट उनको व्यक्तिगत तथा दूतावासका कर्मचारीको इमेल ह्याक भएको प्रष्ट हुन्छ । तर ह्याक भएको इमेलबाट के कति असर पुग्यो भन्ने चाहिँ उल्लेख छैन् ।
यसबारेमा मङ्गलबार साँझ नै वीनेपालीले दूतावासका प्रवक्ता शरदराज आरणसित सम्पर्क गर्दा यो ठूलो समस्या नभएको र समाधान भइसकेको बताए । तर, बुधबार साँझ राजदूत सुवेदीले ‘अहिले खासै समस्या नरहेको तर गत हप्ताहरुदेखि नै व्यक्तिगत र कार्यालयका इमेलहरुमा सुरक्षा संकेतहरु पटकपटक आएको’ बताए ।
उनले अहिले सबै ठीक भएको तर अझै सचेत हुनुपर्ने अवस्था रहेको पनि बताएका छन् ।
ह्याकिङ कसले किन गर्न खोजेको थियो यकिन भइसकेको छैन् ।
