लण्डन । बर्न्टओक नेपाली समाजको १४ औं वार्षिक साधारणसभा शनिबार सम्पन्न भएको छ ।
सभाको शुरुमा संस्थाका महासचिव भोला पनेरुले संस्थाको वार्षिक कार्यप्रगति विवरण प्रस्तुत गरे । त्यस्तै अध्यक्ष उदय गुरुङले कोषाध्यक्षको तर्फबाट आयव्यय विवरण प्रस्तुत गरेका थिए । आमा समूहकी कोषाध्यक्ष कमला गुरुङले आमा समूहको प्रगति विवरण प्रस्तुत गरेकी थिइन् ।
महासचिव पनेरुले हालै समाजले दुई जना सदस्यहरु खडग लुंगेली मगर तथा आरती कम्मु गुरुङलाई गुमाएको बताउँदै उहाँहरुको परिवारलाई सहयोग पुरयाएको बताए ।
साधारणसभामा बोल्दै समाजका मिडिया संयोजक भगीरथ योगीले बर्न्टओक नेपाली समाजको सहयोगमा नेपाली भाषा तथा सांस्कृतिक केन्द्रले गएको दुई वर्षदेखि बालबालिकाकालागि नेपाली भाषा कक्षा सन्चालन गरिरहेको जानकारी दिए । उनले बालबालिकालाई नेपाली बाहेक योग, ध्यान र गीत, संगीत सिकाउने गरिएको पनि बताए । योगीले आगामी दिनमा पनि समाजले नेपाली कक्षालाई सहयोग जारी राख्ने आशा पनि व्यक्त गरे ।
समाजले आउँदो वर्ष १९ अक्टोबरका दिन दशैं तिहारको अवसरमा शुभकामना साँझ तथा १५ जुनमा गृष्मकालिन समर आउटिङ आयोजना गर्ने निधो गरेको छ ।
साधारणसभाले छलफल पछि संस्थाको विधानका केही बुँदाहरु संशोधन गरेको थियो ।
सभाको अन्त्यमा संस्थाका अध्यक्ष उदय गुरुङले सबै सदस्यहरुलाई धन्यवाद दिँदै समाजका सदस्य वयोवृद्ध भूतपूर्व गोर्खा बुवाआमालाई विशेष सहयोगको आवश्यकता परेको बताए । उनले समाजले युवाहरुकालागि खेलकुद आदि कार्यक्रम आयोजना गरी नयाँ पुस्तालाई पनि एक सुत्रमा जोडन काम गरिरहेको पनि बताए ।
साधारणसभा बर्न्टओकस्थित गोस्पेल चर्चमा आयोजना गरिएको थियो ।
