निर्वाचनमै उत्रिए नर्सहरु, अध्यक्ष र उपाध्यक्षमा दुई दुईको उम्मेदवारी

लन्डन । नेपलिज नर्सिङ एसोसिएसन यूकेको नयां कार्यसमिति सहमतिमा चुन्ने सम्भावना टरेको छ । अध्यक्ष र उपाध्यक्ष पदका लागि दुई दुई जनाको उम्मेदवारी परेपछि एसोसिएसनको यही २४ तारिख लन्डनमा निर्वाचन नै हुने भएको हो ।

निर्वाचन समिति संयोजक अजिता सिम्खडाका अनुसार, बुधबार रातीसम्म उम्मेदवारी फिर्ता लिने समयसीमा तोकिएको थियो । तर, अध्यक्षमा विनोदविकास सिम्खडा र इन्दिरा बस्याल तिवारी एवं उपाध्यक्षमा सुनिता गौतम थापा र गंगा साम्पाङको उम्मेदवारी कायमै रहेपछि निर्वाचन नै हुने भएको छ ।

‘निर्वाचन आफैंमा एउटा लोकतान्त्रिक अभ्यास हो । हामी अब निष्पक्ष रुपमा निर्वाचन गराउने 
तयारीमा जुटेका छौं’- संयोजक सिम्खडाले वीनेपालीसंग भनिन्, ‘जो साथीहरु आएपनि नयां टिम डायनामिक बन्नेछ ।’

अन्य पदमा भने आवश्यक संख्या बमोजिम नै उम्मेदवारी परेपछि निर्विरोध भएको छ । निर्विरोध हुनेमा महासचिव रस्मितासिंह दर्लामी, सांस्कृतिक सचिव रफी श्रेष्ठ, कोषाध्यक्ष बिनु लामिछाने र सहकोषाध्यक्ष आज्ञा खनाल छन् ।

त्यसैगरि कार्यकारी सदस्यहरुमा अन्जना सापकोटा, रन्जना केसी अधिकारी, कल्पना घिमिरे, ज्ञानु अधिकारी, शोभा बोहरा, सरिता रिजाल र रजत्री पाण्डे थापा निर्विरोध भएका छन् । बांकी दुई सदस्य नयां कार्यसमितिले मनोनित गर्नेछ ।