बेलायतवासी १७ नेपाली ‘लन्डन टु पेरिस’ साइकलयात्रामा

लन्डन । नेपाली साइक्लिङ क्लब यूकेले आयोजना गरेको ‘लन्डन टु पेरिस’ साइकलयात्रामा बेलायतवासी १७ नेपाली सहभागी भएका छन् ।

नेपालमा रहेका अनाथ तथा विपन्न बालिकाहरुका लागि सहयोग जुटाउने उद्देश्यले ५ जुनदेखि साइकल यात्रा सुरु गरिएको हो । च्यारिटी साइकलयात्रा अभियानमार्फत ६ हजार पाउण्ड संकलन गर्ने लक्ष्य राखिएको क्लबले जनाएको छ । संकलित रकम हेल्प नेपाल नेटवर्कद्वारा काभ्रेमा सञ्चालित बाल गृह ‘चिल्ड्रेन्स सेल्टर’लाई सहयोग गरिनेछ।

यात्रामा जलेन्द्र ताम्राकार, सुलभ पन्त, शिव सैंजु, ह्यारी गुरुङ, कौस्तुभ पौड्याल, समीर प्याकुरेल, आमोद प्रधान, हरिहर उपाध्याय, नारायण अधिकारी, अनमोल राणा, सुधीर बजिमाया, लक्ष्मण गुरुङ, निक टी, प्रगति ओझा, प्रसिद्ध प्रधान र सुधिर श्रेष्ठ सहभागी हुनुहुन्छ । उहाँहरुले तीन दिनमा करिब ३५० किलोमिटर दूरी पूरा गर्नुहुनेछ ।